कर्नाटकातून भाजपसाठी आनंदाची बातमी; तीन जागांवर विजय

Rajya Sabha Election 2022 : राज्यसभा निवडणुकीच्या निकालात कर्नाटकमधून भाजपसाठी एक आनंदाची बातमी समोर आली आहे. राज्यात भारतीय जनता पक्षाने (BJP) 3 जागा जिंकल्या आहेत, तर काँग्रेसने 1 जागा जिंकली आहे. दुसरीकडे, जेडीएसच्या पदरी मात्र निराशा पडली आहे. (rajya sabha election 2022 result bjp won 3 seats in karnataka congress won 1 seat)

केंद्रीय अर्थमंत्री निर्मला सीतारामन, लहारसिंग सिरोया आणि अभिनेता जग्गेश आता कर्नाटकातून भाजपचे राज्यसभा खासदार म्हणून निवडून आले आहेत. त्याचवेळी जयराम रमेश यांना राज्यसभेवर पाठवण्यात काँग्रेसला यश आले आहे. आज कर्नाटकात राज्यसभेच्या चार जागांसाठी मतदान पार पडले.

काँग्रेसने माजी केंद्रीय मंत्री जयराम रमेश आणि पक्षाचे प्रदेश सरचिटणीस मन्सूर अली खान यांना उमेदवारी दिली होती. जनता दल (सेक्यूलर) कडून राज्यसभेत पोहोचण्याच्या शर्यतीत कुपेंद्र रेड्डी सहभागी झाले होते. राज्यातून राज्यसभेच्या चौथ्या जागेसाठी सिरोया, खान आणि रेड्डी यांच्यात थेट लढत होईल असा अंदाज व्यक्त होत होता. जेडीयू (सेक्यूलर) ने गुरुवारी रात्री आपल्या आमदारांना हॉटेलमध्ये ठेवले होते. तर त्यांचे कोलारचे आमदार श्रीनिवास रेड्डी यांनी यापूर्वीच काँग्रेस उमेदवाराला मतदान करण्याचे जाहीर केले होते.