जवानाच्या सुटकेसाठी मागणी; व्हायरल फोटोसोबत नक्षलवाद्यांनी दिलंय निवेदन

विजापूर - छत्तीसगडमधील बस्तर येथे ३ एप्रिल रोजी झालेल्या चकमकीनंतर नक्षलवाद्यांच्या तावडीत सापडलेला कोबरा कमांडो राकेश्‍वरसिंह मन्हास याचा फोटो आज जारी करण्यात आला आहे. या संघर्षामध्ये २२ जवान हुतात्मा झाले होते. सध्या नक्षलवाद्यांकडून प्रसिद्ध झालेले हे छायाचित्र सोशल मीडियामध्ये व्हायरल होते आहे. दुसरीकडे राकेश्‍वरसिंह यांच्या सुटकेसाठी त्यांचे कुटुंबीय आणि निकटवर्तीयांनी आज जम्मू-पूँछ महामार्गावर आंदोलन करत वाहतूक रोखून धरली होती. राकेश यांची नक्षलवाद्यांच्या तावडीतून सुखरूप सुटका होईल असे आश्‍वासन सरकारने द्यावे, अशी मागणी त्यांच्याकडून करण्यात आली.

जवानाच्या व्हायरल फोटोबाबत बोलताना बस्तर रेंजचे पोलिस महासंचालक पी. सुंदरराज म्हणाले की, ‘‘ आम्ही परिस्थितीवर बारकाईने लक्ष ठेवून आहोत. राकेश्‍वरसिंह यांची सुटका व्हावी म्हणून सर्वोतपरी प्रयत्न केले जातील.’’ नक्षलवाद्यांकडून मंगळवारी याबाबतचे एक निवेदन हिंदीतून प्रसिद्ध करण्यात आले असून त्यामध्ये स्पष्टपणे म्हटले आहे की, ‘‘ ज्या ठिकाणावर चकमक झाली तेथून राकेश्‍वर यांना ताब्यात घेण्यात आले.’’ या जवानाची सुखरूप सुटका व्हावी म्हणून छत्तीसगड सरकारने मध्यस्थाची नेमणूक केली आहे. दरम्यान या जवानाला सोडण्याच्या बदल्यात नक्षलवाद्यांकडून नेमक्या कोणत्या मागण्या करण्यात आल्या आहेत हे मात्र सरकारकडून सांगण्यात आलेले नाही.

हे वाचा - Bijapur Maoist Attack: नक्षलवादी हल्ल्यामागील 'मास्टरमाईंड' हिडमा कोण आहे?

नक्षलवाद्यांचे निवेदन
दंडकारण्य विशेष क्षेत्रीय समितीचा प्रवक्ता विकल्प याच्याकडून एक निवेदन प्रसिद्ध करण्यात आले असून यामध्ये राज्य सरकारने मध्यस्थांची नावे जाहीर केल्यानंतरच जवानाची सुटका करण्यात येईल, तोपर्यंत हा जवान आमच्याकडे सुरक्षित राहील असे म्हटले आहे. दरम्यान या जवानाच्या सुटकेच्या बदल्यात नक्षलवाद्यांकडून कोणत्याही नव्या मागण्या करण्यात आलेल्या नाहीत. सध्या पोलिस देखील या निवेदनाची सत्यता पडताळण्याचे काम करत आहेत.

हे वाचा - पगार घेणाऱ्या सैनिकांना शहीद म्हणता येणार नाही; FB पोस्टनंतर लेखिकेवर देशद्रोहाचा गुन्हा

कार्यकर्त्याचा पुढाकार
या अपह्रत जवानाच्या सुटकेसाठी सोनी सोरी या सामाजिक कार्यकर्त्याने पुढाकार घेतला असून तो याआधीच ज्या ठिकाणी चकमक झाली त्या घटनास्थळाच्या दिशेने रवाना झाला आहे. पोलिस देखील स्थानिक लोक, सामाजिक संस्था, लोकप्रतिनिधी आणि पत्रकार यांच्याशी चर्चा करत मार्ग काढण्याचा प्रयत्न करत आहेत.