Road Rage: हॉर्न देऊनही लक्ष दिलं नाही, अल्पवयीन मुलीने केली कर्णबधिराची हत्या

रायपूर : रस्त्यावरून जाताना एका गाडीला हॉर्न वाजवूनही प्रतिसाद न दिल्याने एका पंधरा वर्षाच्या मुलीने कर्णबधिर व्यक्तीची हत्या केल्याची घटना छत्तीसगडमधील रायपूर येथे घडली आहे. या घटनेननंतर सदर अल्पवयीन मुलगी घटनास्थळावरून फरार झाली होती पण पोलिसांनी तिला घटनास्थळावरून २० किमी अंतरावरून ताब्यात घेतलं आहे.

दरम्यान, या घटनेविषयी अधिक माहिती सांगताना आझाद चौक पोलिस स्टेशनच्या प्रभारी आश्विनी राठोड यांनी सांगितलं की, सुदामा लादेर असं हत्या करण्यात आलेल्या व्यक्तीचे नाव असून हा कर्णबधिर होता. तो आपल्या सायकलवर काहीतरी सामान ठेवत होता. त्यावेळी आरोपी मुलगी तिच्या आईबरोबर स्कुटीवरून येत होती. तिने ओव्हरटेक करण्यासाठी या व्यक्तीला हॉर्न वाजवला होता पण त्याला ऐकायला येत नसल्यामुळे त्याने काहीच प्रतिसाद दिला नाही.

त्यानंतर ही मुलगी गाडीवरून खाली उतरून त्याच्याजवळ गेली आणि त्याला ओरडली. पण त्यानंतरही सुदामा नावाच्या व्यक्तीने प्रतिसाद न दिल्याने त्या मुलीने चाकू काढत त्यावर हल्ला करत त्याचा गळा कापला. त्यानंतर स्थानिकांनी त्याला हॉस्पिटलमध्ये दाखल केले पण त्याचा रस्तातच मृत्यू झाला होता. दरम्यान, या घटनेनंतर आरोपी मुलीने तेथून पळ काढला. यानंतर पोलिसांनी तिला घटनास्थळापासून २० किमी अंतरावर पकडलं असून अटक करण्यात आली आहे. या मुलीच्या गुन्ह्याचा रेकॉर्ड विचारला असता ती अल्पवयीन असल्यामुळे तिचा रोकॉर्ड देता येणार नाही अशी माहिती पोलिसांनी दिली आहे.