शाळा सुरु करण्यासाठी विद्यार्थ्याची सुप्रीम कोर्टात धाव; न्यायाधीश म्हणाले...

नवी दिल्ली : देशभरातील शाळा सुरु करण्यात याव्यात यासाठी एका विद्यार्थ्यानं थेट सुप्रीम कोर्टात धाव घेतली आहे. पण कोर्टानं त्याच्या याचिकेवर सुनावणीला नकार दिला. याचिकाकर्त्या विद्यार्थ्यानं अभ्यासकडे लक्ष द्यावं असा सल्ला त्याला कोर्टानं दिला. राज्य सरकारं स्थानिक परिस्थितीनुसार निर्णय घेत असल्याचंही यावेळी कोर्टानं म्हटलं.

दिल्लीतील रहिवासी असलेल्या एका बारावीतील विद्यार्थानं देशभरातील शाळा उघडण्यात याव्यात यासाठी सुप्रीम कोर्टात धाव घेतली होती. ही याचिका आज सुनावणीसाठी कोर्टासमोर आली मात्र, कोर्टात सुनावणीस नकार दिला. यावेळी सुनावणी करणारे न्या. डी. वाय. चंद्रचूड म्हणाले, "विद्यार्थ्यांना प्रत्यक्ष शाळांमध्ये जाऊन शिक्षण सुरु करण्यासाठी पुन्हा शाळा सुरु करण्याचे आदेश आम्ही देऊ शकत नाही. कारण नेमका धोका कुठे असेल हे आम्ही सांगू शकत नाही. कोणत्या जिल्ह्यात सध्या कोविडच्या घटना अधिक आहेत, हे ही आम्हाला माहिती नाही. मुलांनी आता पुन्हा शाळेत जायला हवं यात काही शंका नाही. पण हे राज्य सरकारांनी निश्चित करणं गरजेचं आहे. हा असा मुद्दा आहे ज्याची जबाबदारी राज्यांवर सोपवणं योग्य राहिल"

"आम्ही याला पब्लिसिटी स्टंट म्हणत नाही पण ज्या प्रकारचा दिलासा देण्याची मागणी याचिकेतून करण्यात आली आहे, ती मागणी चुकीची आहे. कारण विविध राज्यांचे नियम वेगवेगळे आहेत. त्यामुळे याबाबतचे आदेश सर्व राज्यांसाठी एकसारखे होऊ शकत नाहीत. विद्यार्थ्यांना अशा प्रकारची याचिका दाखल करता कामा नये. सरकारं याबाबत जागृत आहेत" काही राज्यांनी यापूर्वीच शाळा सुरु केल्या आहेत, असंही यावेळी न्या. चंद्रचूड म्हणाले.

दरम्यान, दिल्लीतील अमर प्रेम प्रकाश (वय १२) या विद्यार्थाने सुप्रीम कोर्टात याचिका दाखल करत शाळा सुरु करण्याची मागणी केली होती. याचिकेत त्यानं म्हटलं की, "गेल्या वर्षी मार्च-एप्रिलपासून शाळा बंद आहेत. याचा विद्यार्थ्यांच्या मानसिकदृष्ट्या परिणाम होत आहे. अनेक विद्यार्थी तणावग्रस्त बनले आहेत. ऑनलाईन सुरु असलेल्या वर्गांमुळे योग्य प्रकारे अभ्यास होत नाहीए"