देवदेवतांच्या नावावर होणार मंदिरांची जमीन; सरकारने सुरू केली प्रक्रिया

नवी दिल्ली : मंदिराच्या पुजाऱ्याऐवजी देव/देवताच मंदिराच्या जमिनीचे मालक असणार आहेत, यासाठी प्रक्रिया सुरू करण्यात आली आहे, अशी माहिती कायदा मंत्री प्रमोद कुमार यांनी शुक्रवारी दिली आहे. तसेच, 6 सप्टेंबर 2021 रोजी जारी केलेल्या सर्वोच्च न्यायालयाच्या आदेशाची बिहार सरकार अंमलबजावणी करणार असल्याचेही प्रमोद कुमार यांनी सांगितले आहे. (Temples Land Now Registered On God's Name In Bihar)

कायद्यात अशी कोणतीही तरतूद नाही की, महसूल रेकॉर्डमध्ये पुजारी किंवा व्यवस्थापकाचे नाव नमूद करणे आवश्यक असल्याचा आदेश न्यायमूर्ती हेमंत गुप्ता आणि न्यायमूर्ती एएस बोपण्णा यांच्या सर्वोच्च न्यायालयाच्या खंडपीठाने (Supreme Court Bench) दिला होता. यावेळी खंडपीठाने रामजन्मभूमी खटल्याच्या निकालाचाही हवाला देत आपल्या निर्णयाच्या बाजूने सांगितले होते की, मंदिरातील देवता जमिनीचा मालक असतो आणि मालमत्ता त्याच्या नावावर ठेवता येते असे म्हटले होते.

दरम्यान, अनधिकृत दाव्यांपासून मालमत्तांचे संरक्षण करण्यासाठी कायदा विभाग लवकरच पुजाऱ्यांची नावे महसूल रेकॉर्डमधून काढून टाकण्यासाठी एक परिपत्रक जारी करणार असल्याचे कुमार यांनी सांगितले आहे.