Jammu Kashmir: तीन दिवसांपासून बेपत्ता जवानाचा संशयास्पद मृतदेह हाती

जम्मू काश्मीर : तीन दिवसांपूर्वी जम्मू काश्मीरमधील बडगाम जिल्ह्यात बेपत्ता झालेल्या भारतीय सुरक्षा दलातील एका जवानाचा मृतदेह आज सापडल्याची माहीती मिळाली आहे. तसेच हा मृतदेह संशयास्पद अवस्थेत मिळाला असून या शरीरावर कुठलीही जखम आढळून आलेली नाही. "बेपत्ता झाल्यापासून तीन दिवसानंतर समीर अहमद मल्ला या जवानाचा मृतदेह काश्मीरमधील बडगाम जिल्ह्यात सापडला आहे." असं जम्मू काश्मीर पोलीसांनी माहीती देताना सांगितलं.

जम्मू काश्मीरमधील बडगाम आणि बारामुल्ला या दोन जिल्ह्यात दहशतवाद्यांच्या कारवाया वाढलेल्या आहेत. तसेच याअगोदरही तिथे अनेक वेळा दहशदवादी हल्ले झाले आहेत. एका आठवड्यापूर्वी बारामुल्ला आणि बडगाम येथून सुरक्षा दल आणि काश्मीर पोलीसांनी ळष्कर-ए-तोय्यबाच्या तीन दहशतवाद्यांना अटक केली होती. तसेच चार आठवड्यापूर्वी ८ फेब्रुवारीला राष्ट्रीय तपास संस्थेने दहशतवादी संघटना अल-कायदाच्या तव्हीद अहमद याला बडगाम जिल्ह्यातून अटक केली होती.

या घटनेवरुन या दोन जिल्ह्यात दहशतवाद्यांच्या कारवाया वाढल्याचं आपल्याला दिसत आहेत. त्या कारवायांना चोख प्रत्युत्तर सुरक्षा दल आणि काश्मीर पोलीसांकडून दिलं जात आहे.

दरम्यान या घटनेची माहीती देताना पोलीस महानिरिक्षक विजय कुमार यांनी सांगितलं की, समीर अहमद मल्ला यांच्या मृतदेहावर कुठल्याही प्रकारची जखम नसून व्रणदेखील आढळले नाहीत. त्याचबरोबर आम्ही या संशयास्पद घटनेकडे दहशतवादी हल्ला आणि खून अशा दोन्ही दृष्टीकोनातून पाहत आहोत. तसेच या प्रकरणाचा अधिक तपास पोलीसांकडून चालू आहे.