मोदींच्या कार्यक्रमासाठी महाविद्यालय बंद, तृणमूलची जोरदार टीका

त्रिपुरा : पंतप्रधान नरेंद्र मोदींच्या (PM Modi) कार्यक्रमासाठी महाविद्यालय बंद ठेवण्यात आले आहे. मोदींच्या हस्ते महाराजा वीर विक्रम विमानतळाच्या (Maharaja Bir Bikram Airport) नवीन इमारतीचे उद्घाटन करण्यात येणार आहे. त्यामुळे विद्यार्थी आणि प्राध्यापकांनी कार्यक्रमाला उपस्थित राहण्याच्या सूचना त्रिपुरा इन्स्टिट्यूट ऑफ टेक्नॉलॉजीच्या (TIT) प्राचार्यांनी दिल्या आहेत. याबाबत त्यांनी एक नोटीस जारी केली आहे. यावरूनच तृणमूल काँग्रेसने (TMC) मोदींवर टीका केली आहे.

प्राचार्यांनी जारी केलेल्या नोटीसमध्ये ४ जानेवारीला महाविद्यालय बंद आहे. त्यामुळे विद्यार्थ्यांनी उपस्थित राहावे, अशी सूचना केली आहे. त्यानंतर तृणमूल काँग्रेसने ट्विट करत मोदींवर निशाणा साधला आहे. '' पंतप्रधान मोदींचा ढोंगीपणा उघड झाला असून मोदींसाठी शिक्षण आणि विद्यार्थ्यांची सुरक्षा याला काहीच प्राधान्य नाही का? विद्यार्थ्यांना उपस्थित राहता यावे म्हणून वर्ग रद्द केले आहेत. कोरोनात लोकांचे जीव धोक्यात घालून कार्यक्रमाला गर्दी व्हावी यासाठी मोदींची ही योजना आहे का?'' असा घणाघात तृणमूलने केला आहे.

दरम्यान, त्रिपुरा कामगार संचालनालयाने आपल्या कर्मचाऱ्यांना स्वामी विवेकानंद मैदानावर पंतप्रधान मोदींच्या कार्यक्रमाला उपस्थित राहण्यास सांगितले आहे. त्यावरून देखील तृणमूलने टीका केली आहे. पंतप्रधानांची कमी होत चाललेली लोकप्रियता आणि असुरक्षिततेमुळे या नोटीसा जारी करण्यात आल्या आहेत, असा दावा तृणमूलने केला आहे. तसेच ओमिक्रॉनमुळे कोरोनाची रुग्णसंख्या वाढत असताना आपण किती जीव धोक्यात घालत आहोत याची काळजी पंतप्रधानांना नाही, असा आरोपही तृणमूलने केला आहे.