वरुण गांधींचा भाजपला पुन्हा घरचा आहेर; आता थेट मोदींवरच निशाणा

नवी दिल्ली : भारतीय जनता पक्षाचे (BJP) खासदार वरुण गांधी यांनी पुन्हा एकदा पक्षाला घरचा आहेर दिला आहे. ओमिक्रॉनचा संसर्ग वाढत असताना रात्रीची संचारबंदी आणि दिवसा हजारोंच्या प्रचारसभा कशाला असा प्रश्न त्यांनी उपस्थित केला आहे. ओमिक्रॉनचा (Omicron) संसर्ग दिवसेंदिवस वाढत आहे. त्यामुळे दिल्ली, उत्तर प्रदेशासह अनेक राज्यांनी पुन्हा एकदा निर्बंध लागू करण्यास सुरुवात केली आहे. अशावेळी उत्तर प्रदेशात (UP Election 2022) दररोज मोठमोठ्या प्रचारसभा भाजपकडून घेतल्या जात आहेत. हजारो लोकांच्या उपस्थितीत विविध विकासकामांची उद््घाटने करण्यात येत आहेत. त्याबद्दल वरुण गांधी (Varun Gandhi) यांनी ट्विट करून नाराजी व्यक्त केली आहे.

‘‘रात्री कर्फ्यू लावणे आणि दिवसा प्रचारसभेत लाखो लोकांना बोलावणे हे सामान्य लोकांच्या आकलनापलीकडचे आहे,’’ अशी खंत वरुण गांधींनी ट्विटद्वारे व्यक्त केली आहे. ‘‘उत्तर प्रदेशातील मर्यादित आरोग्य व्यवस्था लक्षात घेता ओमिक्रॉनला रोखणे की शक्तीप्रदर्शन करणे यात आपले प्राधान्य कशाला आहे, हे प्रामाणिकपणे ठरण्याची गरज आहे,’’ असे वरुण गांधी यांनी म्हटले आहे.

उत्तर प्रदेशाचे मुख्यमंत्री योगी आदित्यनाथ २५ डिसेंबर रोजी गाझियाबादमधील ‘जन विश्वास यात्रे’त उपस्थित होते. यासोबतच राज्यात अनेक प्रचारसभांचे आयोजन करण्यात आले असून पंतप्रधान नरेंद्र मोदींसोबत ते एकाच मंचावर उपस्थित राहणार आहेत. फक्त भाजपच नाही तर काँग्रेस, समाजवादी पक्षदेखील आपली ताकद दाखवण्यासाठी मैदानात उतरले आहेत. उत्तर प्रदेशात पुढील वर्षी विधानसभेची निवडणूक होणार आहे.