हॉटेलमध्ये पोलिसांच्या छाप्यावेळी तरुणाचा मृत्यू; ६ जण निलंबित

उत्तर प्रदेशात एका हॉटेलमध्ये पोलिसांनी तीन तरुणांकडून वसुलीसाठी छापा टाकल्याचा आरोप करण्यात आला आहे. यावेळी एकाचा मृत्यू झाला आहे. आता या प्रकरणात सहा पोलिसांवर निलंबनाची कारवाई करण्यात आली आहे. मृत्यू झालेल्या तरुणाच्या पत्नीने पोलिसांवर हत्येचा गुन्हा दाखल करण्याची मागणी केली आहे.

गोरखपूर इथं फिरण्यासाठी आलेल्या मनीष, प्रदीप आणि अरविंद हे रामगढ ताल परिसरातील कृष्णा पॅलेस हॉटेलमध्ये थांबले होते. सोमवारी सकाळी ते आठ वाजता या ठिकाणी पोहोचले होते. तर रात्री साडेबाराच्या सुमारास पोलिस त्यांच्या रूममध्ये आले. पोलिसांनी यावेळी त्यांचे ओळखपत्र चेक केले. तसंच संबंधित तरुणांचे साहित्यसुद्धा तपासले.

तरुणांचे म्हणणे होते की, इतक्या रात्री झोपमोड करून आमची तपासणी कशासाठी केली जात आहे? आम्ही काय केलं आहे असं विचारताच पोलिसांनी अरविंद नावाच्या तरुणाला मारहाण करून बाहेर काढलं. अरविंदने म्हटलं की, जेव्हा तो बाहेर उभा होता तेव्हा आत मनीषला मारहाण सुरु होती. मनीषच्या चेहऱ्यावर नंतर रक्तही होतं. पोलिसांनीच त्याला गाडीत घालून रुग्णालयात नेलं. तिथं डॉक्टरांनी मनिषला मृत घोषित केलं.

राणा प्रताप चंद या गोरखपूरमधील रहिवाशाने दिलेल्या माहितीनुसार, तीन तरुण त्यांचे मित्र आहेत. त्यांना भेटण्यासाठी इथे आले होते. मात्र पोलिसांनी बाहेरचे असल्याचं समजून त्यांच्याकडून वसुली करण्यासाठी घुसले. यावेळी तरुणांनी विऱोध केल्यानं हा मारहाणीचा प्रकार घडला असावा.

मनीषच्या मृत्यूची माहिती मिळताच त्याची पत्नी कानपूरवरून गोरखपूरला पोहोचली. तिने म्हटलं की, 'पतीने मला फोनवर पोलिस मारहाण करत असल्याचं सांगितलं. तसंच जेव्हा पुन्हा फोन केला तेव्हा उचलला नाही.' मनीषच्या पत्नीने पोलिसांविरोधात गुन्हा दाखल करण्याची आणि कारवाईची मागणी केली. त्यानंतर तडकाफडकी ६ पोलिसांना निलंबित करण्यात आलं आहे.