Delhi High Court : ‘ईडी’समोर हजर का होत नाही? दिल्ली उच्च न्यायालयाचा केजरीवाल यांना सवाल

नवी दिल्ली : ‘ईडी’ने वारंवार समन्स देऊनही तुम्ही समोर हजर का होत नाही? असा सवाल आज उच्च न्यायालयाने मुख्यमंत्री अरविंद केजरीवाल यांना विचारला. केजरीवाल यांना अटकेपासून संरक्षण न देता यासंदर्भातील दाखल केलेल्या याचिकेवर पुढील सुनावणी येत्या २२ एप्रिलला होणार आहे.

उत्पादन शुल्क गैरव्यवहार प्रकरणी ईडीच्या समन्सला प्रतिसाद न दिल्यामुळे सत्र न्यायालयात विरोधात याचिका दाखल केली आहे. सत्र न्यायालयाने हजर होण्याचे निर्देश दिले होते. याला मुख्यमंत्री केजरीवाल यांनी आव्हान दिले आहे. केजरीवाल यांची बाजू मांडताना अभिषेक मनु सिंघवी ईडीचे समन्स बेकायदा असून समन्सला हजर राहण्याची गरज नसल्याचे सांगितले. यावर उच्च न्यायालयाने ईडीसमोर हजर का होत नाही? असा सवाल केला.

सिंघवी म्हणाले, ‘ मनीष सिसोदिया आणि खासदार संजय सिंह यांना अशीच अटक केली आहे. ईडी समोर हजर झाल्यानंतर अटक होणार नाही, असे निर्देश उच्च न्यायालयाने द्यावे, असा युक्तिवाद केला. परंतु न्यायालयाने तसे निर्देश देण्यास नकार दिला. यापुढील सुनावणी २२ एप्रिलला होणार आहे.