Lalu Prasad Yadav : लालूंच्या भ्रष्टाचाराच्या आरोपांची चौकशी का होऊ नये;भाजप नेत्याचा सवाल

नवी दिल्ली : बिहारचे माजी मुख्यमंत्री लालूप्रसाद यादव यांच्या सीबीआय चौकशीवरून भाजपने जनता दल (युनायटेड) आणि राष्ट्रीय जनता दलावर निशाणा साधला आहे. माजी केंद्रीय मंत्री आणि भाजपचे ज्येष्ठ नेते रविशंकर प्रसाद म्हणाले की, २०१७ मध्ये नितीशकुमार यांनी लालूप्रसाद यादव यांची साथ सोडली होती कारण त्यांना या घोटाळ्यांची उत्तरे मिळत नव्हती.

भ्रष्टाचाराच्या गंभीर आरोपांना उत्तर द्यायचे की नाही, असा सवाल त्यांनी केला. भाजप मुख्यालयात आयोजित पत्रकार परिषदेत प्रसाद म्हणाले की, आज जेव्हा या घोटाळ्यांवर आरोपपत्र दाखल झाले आणि तपास सुरू असताना हाय-तौबा कशासाठी?

भाजप नेते म्हणाले की, काँग्रेसच्या कार्यकाळात चारा घोटाळ्याप्रकरणी लालूप्रसाद यादव यांच्याविरोधात जनहित याचिका दाखल करण्यात आल्या होत्या. एक याचिका भाजप नेते सुशीलकुमार मोदी आणि दुसरी याचिका जेडीयूचे राष्ट्रीय अध्यक्ष राजीव रंजन सिंह उर्फ ललन सिंह यांनी दाखल केली होती.

घोटाळ्याच्या चार प्रकरणात लालूप्रसाद यांना दोषी ठरवण्यात आले असून काही प्रकरणांमध्ये अपिल प्रलंबित आहेत. बिहारचे मुख्यमंत्री नितीश कुमार यांच्यावर निशाणा साधताना प्रसाद म्हणाले की, नितीश बाबूंनी स्वत:ला बिहारचे सुशासन बाबू म्हणवून घेणे थांबवावे. ज्या पद्धतीने त्यांनी बिहार राज्याला मागे ढकलले आहे, त्यामुळे जनता लवकरच त्यांना धडा शिकवेल.