Davos Agenda 2022 : पंतप्रधान नरेंद्र मोदी सोमवारी संबोधित करणार

वर्ल्ड इकॉनॉमिक फोरम (WEF) येथे ऑनलाइन होणाऱ्या पाच दिवसीय दावोस अजेंडा समिटच्या पहिल्या दिवशी सोमवारी (ता. १७) पंतप्रधान नरेंद्र मोदी (Narendra Modi) ‘जगाची स्थिती’ या विषयावर विशेष भाषण करणार आहेत. दावोस अजेंडा (Davos Agenda 2022) हे शिखर परिषद सलग दुसऱ्या वर्षी डिजिटल पद्धतीने आयोजित केली जात आहे.

सोमवारी चीनचे राष्ट्राध्यक्ष शी जिनपिंग यांच्या भाषणाने शिखर परिषदेला सुरुवात होणार आहे. यानंतर दोन आभासी सत्रे होतील. पहिले कोरोना आणि दुसरे चौथ्या औद्योगिक क्रांतीमधील तंत्रज्ञान सहकार्यावर होईल. सोमवारी रात्री ८.३० वाजल्यापासून पंतप्रधान मोदींचे (Narendra Modi) विशेष भाषण सुरू होईल. त्यांच्यानंतर संयुक्त राष्ट्रांचे सरचिटणीस अँटोनियो गुटेरेस परिषदेला संबोधित करतील.

इस्राईलचे पंतप्रधान नफताली बॅन्नेट्ट आणि जपानचे पंतप्रधान किशिदा फ्युमिओ मंगळवारी संबोधित करणार आहेत. कार्यक्रमाची घोषणा करताना वर्ल्ड इकॉनॉमिक फोरमने (World Economic Forum) सांगितले की, दावोस अजेंडा (Davos Agenda 2022) हा पहिला जागतिक मंच असेल जिथे जगभरातील महत्त्वाचे नेते २०२२ साठीचे त्यांचे व्हिजन शेअर करतील. या कार्यक्रमाची थीम ‘जगाची स्थिती’ आहे.