एकतर्फी प्रेमातून पोलिसाच्या मुलीची हत्या; चार तास मृतदेहासोबत...

उत्तर प्रदेशाच्या (Uttar Pradesh) कानपूरमध्ये (Kanpur) एका विद्यार्थिनीची हत्या झाल्याची घटना समोर आली आहे. या विद्यार्थीनीवर प्रेम करणाऱ्या एका युवकानेच या विद्यार्थिनीची हत्या केली आहे. या युवकाने त्याच्या दोन मित्रांसोबत मिळून ही हत्या केल्याचं समोर आलं आहे. एकतर्फी प्रेमातून ही हत्या घडली असून, अतिशय निर्घूनपणे ही हत्या (Assassination) करण्यात आली.

सोमनाथ नावाच्या एका विद्यार्थ्याचं या विद्यार्थीनीवर एकतर्फी प्रेम होतं. या तरुणाने आपल्या भावना व्यक्त केल्यानंतर तरुणीने त्याला नकार दिला होता. यामुळे संतापलेल्या मुलाने कट रचून २९ डिसेंबरला भेटायला बोलावलं आणि नंतर मुलीला त्याच्या गाडीत बसवलं. आरोपीने मुलीला आधी ज्यूसमध्ये नशेच्या गोळ्या पाजल्या आणि नंतर तिचा गळा दाबून खून केला.

चार तास मृतदेहासोबत फिरत होते आरोपी

त्याचवेळी विद्यार्थिनी रात्री ८ वाजेपर्यंत घरी न पोहोचल्याने नातेवाइकांनी तिला फोन केला असता अज्ञात व्यक्तीने फोन उचलला व मुलगी एका पुलाखाली पडलेली असल्याचं कुटुंबीयांना सांगितलं. माहिती मिळताच मुलीच्या कुटुंबीयांनी घटनास्थळी धाव घेतली आणि तिला रुग्णालयात दाखल केलं. तेथे तपासणीअंती डॉक्टरांनी त्यांना मृत घोषित केले. त्यानंतर ही माहिती पोलिसांना देण्यात आली.

पोलिसांनी मृतदेह ताब्यात घेऊन शवविच्छेदनासाठी पाठवून प्रकरणाचा तपास सुरू केला आहे. या प्रकरणी पोलिसांनी दोन आरोपींना अटक केली असून तिसरा आरोपी अदयाप फरार आहे. आरोपींची चौकशी केल्यानंतर ते तब्बल चार तास ते मृतदेह सोबत घेऊन फिरत होते असं समजलं.