Narendra Modi : युवक तेव्हाच मत देतात जेव्हा त्यांना...; गुजरात विजयानंतर मोदींकडून आभार

नवी दिल्ली - बहुचर्चित गुजरात विधानसभा आणि हिमाचलप्रदेश विधानसभा निवडणुकीचा निकाल आज जाहीर झाला. या निवडणुकीत काँग्रेसने हिमाचल प्रदेशमध्ये सत्तेत पुनरागमन केलं. तर गुजरातमध्ये भाजपने सत्ता कायम राखत ऐतिहासिक विजयाची नोंद केली. भाजपच्या विजयानंतर पंतप्रधान नरेंद्र मोदी यांनी मतदारांचे आभार मानले. Narendra Modi news in Marathi

पंतप्रधान नरेंद्र मोदी म्हणाले की, हिमाचल प्रदेशात दर निवडणुकीत सत्तांतराची परंपरा आहे. मात्र आजपर्यंत कधीही पराभूत पक्षाचा केवळ एक टक्का मतांच्या फरकाने पराभव झाला नव्हता. जरी हिमाचलमध्ये पराभव झाला असला तरी तेथील विकासासाठी शतप्रतिशत काम करू असं आश्वासन पंतप्रधान नरेंद्र मोदी यांनी यावेळी दिलं.

पंतप्रधान मोदी पुढं म्हणाले की, कोरोना महामारीनंतर बिहारमध्ये निवडणूक झाली. त्या निवडणुकीत भाजपला जनतेने भरभरून मते दिली. त्यानंतर मणिपूर, गोवा, उत्तर प्रदेशमध्ये झालेल्या निवडणुकांमध्ये भाजपला पाठिंबा दिला. जेव्हा देशासमोर आव्हान उभे राहाते तेव्हा जनता भाजपच्या पाठिशी उभी असते.

दरम्यान तरुणवर्ग तेव्हाच मतदान करतो, जेव्हा त्याला विश्वास असतो. तरुणांनी भाजपला मतदान केलं. त्याचा भाजपवर विश्वास निर्माण झाला. आदिवासी समूदाय भाजपला आपला पक्ष मानतात. ४० पैकी ३४ राखीव जागांवर भाजपला विजय मिळाला आहे. भाजपनेच देशाला पहिल्या आदिवासी राष्ट्रपती दिल्या. भारतातील गरिबी घटत असल्याचं तज्ज्ञ सांगत आहेत, असंही मोदी म्हणाले.