NHAI मध्ये सरकारी नोकरीची मोठी संधी; 'या' पदांसाठी होणार भरती

NHAI Recruitment 2021 : सरकारी नोकरीच्या शोधात असणाऱ्या उमेदवारांसाठी ही महत्वाची बातमी आहे. भारतीय राष्ट्रीय महामार्ग प्राधिकरणामध्ये (National Highways Authority of India) विविध पदांची भरती केली जाणार आहे. रस्ते वाहतूक आणि महामार्ग मंत्रालयांतर्गत भारतीय राष्ट्रीय महामार्ग प्राधिकरणनं (NHAI) भरतीसंदर्भात नुकतीच अधिसूचना जारी केलीय.

यात डेप्युटी मॅनेजर (फायनान्स आणि अकाऊंट्स) आणि डेप्युटी मॅनेजर (टेक्निकल) या पदांच्या भरतीसाठी दोन स्वतंत्र जाहिराती प्रसिद्ध करण्यात आल्या आहेत. प्राधिकरणानं प्रसिद्ध केलेल्या भरती जाहिरातींनुसार एकूण 90 पदांसाठी भरती केली जाणार असून या पदांसाठी लागणारी शैक्षणिक पात्रता, वयोमर्यादा, अनुभव, पगार यांचा सविस्तर तपशील अधिसूचनेत देण्यात आलाय.

डेप्युटी मॅनेजर : NHAI नं जाहीर केलेल्या भरती जाहिरातीनुसार, डेप्युटी मॅनेजर (फायनान्स आणि अकाऊंट्स) पदांपैकी ६ पदे अनारक्षित आहेत, तर 5 पदे ओबीसी (नॉन-क्रिमी लेयर), 3 एससी, 1 एसटी आणि 2 ईडब्ल्यूएस उमेदवारांसाठी राखीव आहेत. या पदांसाठी उमेदवारांकडे मान्यताप्राप्त विद्यापीठ किंवा इतर उच्च शिक्षण संस्थेतून कॉमर्स/सीए/ सीएमएमध्ये पदवी असणं गरजेचं आहे. याशिवाय उमेदवारांना संबंधित कामाचा 4 वर्षांचा अनुभव असावा.

डेप्युटी मॅनेजर : डेप्युटी मॅनेजर (टेक्निकल) पदांसाठी जाहिरात केलेल्या 73 पदांपैकी 27 अनारक्षित आणि 21 ओबीसी-एनसीएल, 13 एससी, 5 एसटी आणि 7 जागा ईडब्ल्यूएस उमेदवारांसाठी राखीव आहेत. इच्छुक उमेदवार NHAI च्या अधिकृत वेबसाइटवर nhai.gov.in उपलब्ध करून दिलेल्या ऑनलाइन अर्जाद्वारे अर्ज करू शकतात. डेप्युटी मॅनेजर (फायनान्स आणि अकाऊंट्स) पदांसाठी अर्ज करण्याची शेवटची तारीख 29 नोव्हेंबर, तर डेप्युटी मॅनेजर (टेक्निकल) पदांसाठी उमेदवार 30 नोव्हेंबर 2021 पर्यंत ऑनलाइन अर्ज करू शकतात.