Vladimir Putin: "रशियातील निवडणुका केवळ लबाडी," अमेरिकेतून पुतीन यांच्यावर का होतेय टीका?

Presidential Election Of Russia 2024:

रशिया-युक्रेन युद्धाच्या पार्श्वभूमीवर रशियामध्ये राष्ट्राध्यक्षपदाची निवडणूक सुरू आहे. आजपासून (१५ मार्च) राष्ट्रपतीपदाच्या निवडणुकीला सुरुवात झाली आहे. या निवडणुकीत राष्ट्राध्यक्ष व्लादिमीर पुतिन पुन्हा निवडून येणार हे निश्चित मानले जात आहे.

पुतीन यांनी नुकतेच एका व्हिडिओ संदेशात रशियन नागरिकांना मतदान केंद्रांवर जाऊन निर्भयपणे मतदान करण्याचे आवाहन केले.

रशियामध्ये 15-17 मार्च रोजी राष्ट्रपतीपदाच्या निवडणुका होणार आहेत. पुतीन हे पाचव्यांदा रशियाचे राष्ट्राध्यक्ष होतील अशी अपेक्षा आहे.

दरम्यान रशियात होत असलेल्या निवडणुका केवळ एक लबाडी आहे, अशी टीका अमेरिकेतून होत आहे. यातून ते अप्रत्यतक्षपणे पुतिन यांच्यावर टीका करत आहेत.

७१ वर्षीय पुतिन त्यांच्या पाचव्या कार्यकाळासाठी निवडणूक लढवत असताना त्यांच्यासमोर एकही विरोधक नाही. त्यांचे राजकीय प्रतिस्पर्धी एकतर तुरुंगात आहेत किंवा परदेशात आसरा घेत आहेत. पुतिन यांचे कट्टर विरोधक मानले जाणारे ॲलेक्सी नवलनी यांचा नुकताच तुरुंगात मृत्यू झाला होता.

निरीक्षकांना निवडणुका मुक्त आणि निष्पक्ष होतील अशी आशा कमी आहे. मतदारांकडे फार कमी पर्याय आहेत. या वस्तुस्थितीपलीकडे, स्वतंत्र देखरेखीच्या शक्यता फार मर्यादित आहेत. रशियातील 100,000 मतदान केंद्रांवर तीन दिवसांत मतदान होणार आहे.

अमेरिका ही निवडणूक गांभीर्याने घेत नाही. त्याचबरोबर रशियातील निवडणुका म्हणजे केवळ दिखावा असल्याचे अमेरिकेचे मत आहे.

वॉशिंग्टनमधील सेंटर फॉर युरोपियन पॉलिसी ॲनालिसिस येथील डेमोक्रॅटिक रेझिलियन्सचे संचालक सॅम ग्रीन म्हणाले, "रशियामध्ये होत असलेली निवडणूक ही एक लबाडी आहे. पुतिन निवडणुकीवर नियंत्रण ठेवत आहेत."