Plane Crash : फ्लोरिडाच्या गल्फ कोस्टजवळ विमान कोसळलं; दुर्घटनेत दोन महिलांसह 4 जण ठार

व्हेनिस : फ्लोरिडाच्या गल्फ कोस्टजवळ (Florida Gulf Coast) गुरुवारी एक विमान (Plane Crash) कोसळलं. या दुर्घटनेत चार जणांचा मृत्यू झाला. स्थानिक पोलिसांनी ही माहिती दिलीये.

विमान अपघातात ठार झालेल्यांमध्ये दोन महिलांचा समावेश आहे. सध्या पोलिसांनी सर्व मृतदेह ताब्यात घेतले आहेत. मिळालेल्या माहितीनुसार, विमानानं व्हेनिस विमानतळावरून उड्डाण केलं होतं आणि पश्चिमेकडील मेक्सिकोच्या आखातात ते कोसळलं. व्हेनिसचे पोलीस (Venice Police) अधिकारी अँडी लीसेनरिंग यांनी सांगितलं की, 'घटनास्थळी उपस्थित लोकांनी 911 वर कॉल करून विमान अपघाताची माहिती दिली.'

सीसीटीव्ही फुटेजची पाहणी

पोलीस अधिकाऱ्यानं सांगितलं की, विमानतळावर उपलब्ध असलेले व्हिडिओ फुटेज आणि अपघातस्थळाचा आढावा घेतला जाईल. नॅशनल ट्रान्सपोर्टेशन सेफ्टी बोर्ड या प्रकरणाची चौकशी करत असून व्हिडिओ फुटेज त्यांच्याकडं सोपवण्यात आले आहेत.

ते पुढं म्हणाले, दुपारी काही वेळापूर्वी पाईपर PA-32R विमान सुमारे 23 फूट पाण्याखाली दिसलं. विमान अपघातात ठार झालेल्या चौघांची ओळख पटली आहे. विल्यम जेफ्री लम्पकिन (64), पॅट्रिशिया लम्पकिन (68), रिकी जो बीव्हर (60), एलिझाबेथ अॅनी बीव्हर (57) अशी पीडितांची नावं आहेत.

व्हेनिस हे सेंट पीटर्सबर्गच्या दक्षिणेस 58 मैल (93 किमी) अंतरावर फ्लोरिडाच्या गल्फ कोस्टवर स्थित आहे. डिसेंबरमध्ये व्हेनिसजवळ अशाच अपघातात एकाच कुटुंबातील तिघांचा मृत्यू झाला होता. मात्र, पोलीस अधिकाऱ्यानं ही घटना असामान्य असल्याचं म्हटलं.