‘अज्ञात न्यूमोनिया’ कोरोनापेक्षा घातक; कझाकस्तानमध्ये अनेक बळी गेल्याचा चीनचा दावा

बीजिंग - कझाकस्तानमध्ये न्यूमोनियासारख्या रोगाचा धोका असून याचा मृ्त्यूदर कोरोनापेक्षाही अधिक आहे, असा इशारा चीनने कझाकस्तानमधील आपल्या नागरिकांना दिला आहे. या ‘अज्ञात न्यूमोनिया’मुळे मागील सहा महिन्यांतच कझाकस्तानमध्ये १७७२ जणांचा मृत्यू झाला असून त्यातील ६२८ जण केवळ जून महिन्यातच दगावले आहेत, असे चीनच्या दूतावासाने जाहीर केले आहे. मृतांमध्ये चिनी नागरिकांचाही समावेश असल्याचे त्यांनी सांगितले. कझाकस्तान सरकारने मात्र हा दावा फेटाळला आहे.  

- ताज्या बातम्यांसाठी डाऊनलोड करा ई-सकाळचे ऍप

चिनी दूतावासाच्या म्हणण्यानुसार, कझाकस्तानमधील ‘अज्ञात न्यूमोनिया’ कोरोना विषाणूपेक्षाही अधिक धोकादायक असून यावर अनेक आरोग्य संस्था त्यावर अभ्यास करत आहेत. 

या नव्या विषाणूचा कोरोनाशी काहीही संबंध नसल्याचे प्राथमिक संशोधनातून दिसून आले आहे. तरीही, कझाकस्तानमधील चिनी नागरिकांनी सावध रहावे, असे दूतावासाने सांगितले आहे. या न्यूमोनियाचा प्रसार चीनमध्येही होऊ शकतो, त्यामुळे वेळीच उपाययोजना करायला हव्यात. कझाकस्तानची सीमा चीनच्या शिनजिआंग प्रांताला मिळते. कझाखस्तानमधील तीन प्रांतांमध्ये किमान ५०० जणांना न्यूमोनियासारखा आजार झाला असल्याचे आणि या आजाराच्या रुग्णांची संख्या कोरोनापेक्षाही दुप्पट असल्याचे स्थानिक माध्यमांमध्ये सांगितल्याचा दावा चिनी दूतावासाने केला आहे. कझाखस्तानमध्ये राहणाऱ्या चिनी नागरिकांनी आरोग्याची काळजी घ्यावी, अशी सूचना आहे. 

- पुण्याच्या बातम्या वाचण्यासाठी येथे ► क्लिक करा

चीनची बातमी खोटी
चिनी दूतावासाने चुकीच्या बातमी प्रसिद्ध करून अकारण संशयाचे वातावरण निर्माण केले असल्याची टीका कझाकस्तान सरकारने केली आहे. तसेच, कझाकस्तानमध्ये न्यूमोनियासारखा कोणताही संसर्गजन्य रोग पसरत नसल्याचे स्पष्ट केले आहे. कझाक सरकारने जागतिक आरोग्य संघटनेच्या मार्गदर्शक तत्वांनुसार, विविध आजारांमुळे मृत्यू झालेल्यांची संख्या एकत्र केली होती, तीच चिनी दूतावासाने ‘अज्ञात न्यूमोनिया’चे बळी म्हणून प्रसारित केली, असा दावा सरकारी अधिकाऱ्यांनी केला.

Edited By - Prashant Patil