नाताळचा दिवसच ठरला शेवटचा! स्फोटात सुसाइड बॉम्बरसह ६ जण ठार

कांगोतील (Congo) बेनी (Beni) शहरामध्ये नाताळच्या (Christmas) दिवशीच मोठा हल्ला झाला. आत्मघाती हल्ल्यामध्ये हल्लेखोरासह सहा जण ठार झाल्याची माहिती समोर येत आहे. एका रेस्टॉरंटबाहेर स्फोट घडवून आणण्यात आला. शहरामध्ये मुस्लिम कट्टरपंथीय असल्याचं सांगितलं जात आहे. घटनास्थळावरचे फोटो आता सोशल मीडियावर व्हायरल होत आहे.

याबाबत मिळालेल्या माहितीनुसार, सुसाइड बॉम्बरने शनिवारी गर्दीच्या ठिकाणी हा स्फोट घडवून आणला. बेनी शहरात झालेल्या या स्फोटात सुसाइड बॉम्बरसह सहा जण ठार झाल्याचं स्थानिक अधिकाऱ्यांनी म्हटलं आहे. इनबॉक्स नावाच्या रेस्टॉरंटमध्ये गर्दीच्या वेळी हा स्फोट झाला. यानंतर गोळीबारही झाल्यानं नागरिकांमध्ये भीतीचं वातावऱण निर्माण झालं.

बॉम्ब स्फोटात सहा जण ठार झाले असून १४ जण जखमी असल्याची माहिती स्थानिक अधिकाऱ्यांनी दिली. सुसाइड बॉम्बरला सुरक्षा रक्षकांनी गर्दी असलेल्या रेस्टॉरंटमध्ये घुसण्यापासून अडवले. त्यामुळे मोठी जिवित हानी टळल्याचंही महापौरांकडून सांगण्यात आले. बेनी शहरातले इस्लामिक स्टेटचे स्लीपर सेल सक्रीय झाले असून त्यांच्याकडून हा हल्ला केला असण्याची शक्यता वर्तवली जात आहे.

बेनी शहराच्या महापौरांनी नागरिकांना या घटनेनंतर घरी परतण्याचं आवाहन केलं. तसंच घटनेची चौकशी केली जात असल्याची माहितीसुद्धा महापौरांनी दिली. जून महिन्यातसुद्धा बेनी शहर दोनवेळा स्फोटाने हादरलं होतं. तेव्हा इस्लामिक स्टेटने याची जबाबदारी घेतली होती.