युक्रेनच्या मदतीला बकरी आली धावून; रशियाचे ४० सैनिक गंभीर जखमी

रशिया आणि युक्रेनच्या युद्धाला आता जवळपास चार महिन्यांहून अधिक काळ उलटून गेला आहे. या युद्धाची तीव्रता कमी होण्याचं नावच घेत नाहीये. अशातच आता या युद्धात एका बकरीची जोरदार चर्चा होऊ लागली आहे. या बकरीमुळे रशियाचे ४० सैनिक गंभीर जखमी झाले आहेत. सोशल मीडियावर या बकरीला गोट ऑफ कीव असं संबोधलं जातंय. (Russia Ukraine War news)

या बकरीला गोट ऑफ कीव (Goat of Kyiv) म्हणण्याचं कारण म्हणजे युक्रेनचा गुप्तचर यंत्रणेचा पायलट घोस्ट ऑफ कीव (Ghost of kyiv). त्याने युद्धादरम्यान रशियाच्या विमानांवर हल्ला चढवत हरवलं होतं. या बकरीआधी एका कुत्र्यानेही युक्रेनला रशियाविरोधातल्या युद्धात मदत केली आहे. याआधी जॅक रसल या कुत्र्याने युद्धादरम्यान २०० हून अधिक स्फोटकं शोधून काढत युक्रेनी सैन्याची मदत केली होती.

काय केलं या बकरीने?

रशिया-युक्रेन युद्ध (Russia Ukraine War) आता पाचव्या महिन्यात पोहोचलं आहे. या दरम्यान रशियन सैन्याने दक्षिण पूर्व युक्रेनमधल्या जापोरिजिया ओब्लास्ट मधल्या रोजडोरी गावात एक ग्रेनेड ट्रॅप लावला होता. एका हॉस्पिटलच्या चारही बाजूंनी तारा लावण्यात आल्या होत्या. या दरम्यान एक बकरी तिथे गेली आणि तारांना तिचा स्पर्श झाल्याने हे ग्रेनेड फुटले. या स्फोटामध्ये कमीत कमी ४० रशियन सैनिक गंभीर जखमी झाले.

युक्रेनच्या (Ukraine News) गुप्तचर यंत्रणेने दिलेल्या माहितीनुसार, बकरीच्या हालचालींमुळे अनेक ग्रेनेड्सचा स्फोट झाला आणि रशियाच्या सैनिकांना गंभीर जखमा झाल्या आहेत. ही बकरी या स्फोटामधून वाचू शकली की नाही, हे अद्याप स्पष्ट झालेलं नाही.