Mumbai Attacks : 26/11 चा हल्ल्याचा कट रचणारा दहशतवादी अब्दुल सलाम भुट्टावीचा मृत्यू

मुंबईमधील 26/11ला झालेल्या भ्याड दहशतवादी हल्ल्याचा कट रचणारा कुख्यात दहशतवादी अब्दुल सलाम भुट्टावीचा मृत्यू झाला आहे. अब्दुल सलाम भुट्टावी हा पाकिस्तानच्या तुरुंगामध्ये होता. लष्कर-ए-तोएबा दहशतवादी संघटनेचा दहशतवादी आणि हाफिज सईदचा जवळचा सहकारी अब्दुल सलाम भुट्टावी याचा पाकिस्तानच्या तुरुंगात हृदयविकाराच्या झटक्यामुळे मृत्यू झाल्याची माहिती पाकिस्तानी मीडिया रिपोर्टमधून समोर आली आहे. (Latest Marathi News)

कुख्यात दहशतवादी अब्दुल सलाम भुट्टावी हा 78 वर्षांचा होता. अब्दुल सलाम भुट्टावी 2020 पासून टेरर फंडीग प्रकरणी म्हणजेच दहशवतवादाला आर्थिक खतपाणी घातल्याच्या आरोपाखाली पाकिस्तानच्या तुरुंगात शिक्षा भोगत होता.(Latest Marathi News)

संयुक्त राष्ट्र संघाकडून 2012 मध्ये, अब्दुल सलाम भुट्टावीला आंतरराष्ट्रीय दहशतवादी म्हणून घोषित करण्यात आलं होतं. त्यानंतर दहशतवादाला आर्थिक मदत केल्याच्या प्रकरणात पाकिस्तानमध्ये अटक करण्यात आली होती. ऑगस्ट 2020 मध्ये अब्दुल सलाम भुट्टावीला 16 वर्षांची शिक्षा सुनावण्यात आली होती. तेव्हापासून तो पाकिस्तानच्या तुरुंगात कैद होता.(Latest Marathi News)

2008मध्ये मुंबईमध्ये झालेल्या 26/11च्या दहशतवादी हल्ल्याचा मास्टरमाईंड हाफिज सईदच्या अटकेनंतर अब्दुल सलाम भुट्टावीने 2002 आणि 2008 मध्ये लष्कर-ए-तोएबाचा कार्यकारी प्रमुख म्हणून काम पाहिलं होतं. लष्करशी संबंधित सूत्रांनी दिलेल्या माहितीनुसार, भुट्टावीचा सोमवारी रात्री उशिरा मृत्यू झाला. भुट्टावीचं सोमवारी दुपारी पाकिस्तानच्या पंजाब प्रांतातील शेखपुरा तुरुंगात हृदयविकाराच्या झटक्याने निधन झालं आहे.(Latest Marathi News)