कोरोनावरील लस घ्या अन् कोट्यधीश व्हा!

वॉशिंग्टन- जगभरात गेल्या दीड वर्षांपासून कोरोना महामारी थैमान घालत आहे. अनेक राज्यांमध्ये कोरोना स्थिती गंभीर आहेत, तर अनेक देशांनी विविध मार्गांनी संसर्गावर नियंत्रणाचा प्रयत्न केला आहे. सुरुवातीच्या काळात लस उपलब्ध नसल्याने अनेक देशांना कठोर लॉकडाऊनचा अवलंब करावा लागला. पण, आता कोरोना प्रतिबंधक लस उपलब्ध झाली आहे. अनेक कंपन्यांच्या लशी बाजारात आल्या आहेत. मोठ्या प्रमाणात लसीकरणही सुरु करण्यात आलं आहे. असे असताना काही ठिकाणी लसीकरणाला म्हणावा तसा प्रतिसाद मिळताना दिसत नाहीये. या पार्श्वभूमीवर अमेरिकेतील ओहिओ राज्याने एक भन्नाट ऑफर आणली आहे. यामुळे लसीकरणचा वेग वाढल्याचं दिसून आलंय. (Ohio get COVID vaccine be millionaire Vax a Million lottery campaign)

ओहिओ राज्याने लशीचा किमान एक डोस घेणाऱ्यांसाठी लॉटरी आणली आहे. लशीचा डोस घेणाऱ्याला लॉटरी लागली तर तो 1 मिलियन डॉलर (7 कोटींपेक्षा अधिक) जिंकू शकतो. विशेष म्हणजे दर एक आठवड्याला ही लॉटरी कोणाला लागली ते घोषित केले जाणार आहे. पाच आठवड्यांसाठी हे लॉटरी कॅम्पेन सुरु असेल. यासाठी प्रशासनाने कोविड-19 रिलिफ फंडमधून 5 मिलियन डॉलरला मंजुरी दिली आहे. विशेष करुन किशोरवयीन मुलांना लस घेण्यासाठी प्रोत्याहित करण्यासाठी हे कॅम्पेन आणण्यात आलं आहे.

अमेरिकेमध्ये लसीकरणाला सुरुवात झाली असून मोठ्या लोकसंख्येला लस देण्यात आली आहे. असे असले तरी अजून 40 टक्के तरुणांनी लस घेतलेली नाही. अशा लोकांना लस घेण्यासाठी प्रोत्साहित करण्यासाठी सरकारने विविध मार्गाने प्रयत्न चालवले आहेत. ओहिओ सरकारने पहिल्या विजेत्याचीही घोषणा केली आहे. Abbigail Bugenske याला एक मिलियन अमेरिकी डॉलरची लॉटरी लागली आहे. टेलिव्हिजनवरुन याची घोषणा करण्यात आली होती. उत्तेजनार्थ बक्षीसही जाहीर करण्यात आलं आहे. यामध्ये किशोरवयीन मुलांना पुढील शिक्षणासाठी शिष्यवर्ती दिली जात आहे.

ओहिओ सरकारने सुरु केलेल्या “Vax-a-Million” योजनेला तुफान प्रतिसाद मिळत आहे. आतापर्यंत जवळपास 30 लाख लोकांनी या लॉटरीसाठी नाव नोंदवलं आहे. शिवाय लसीकरण केंद्रावर मोठी गर्दी होत असल्याचं पाहायला मिळत आहे. अनेक लोक लस घेण्यासाठी पुढाकार घेत आहे. सरकारने जारी केलेल्या या लॉटरी पद्धतीची जगभरात चर्चा सुरु झाली आहे.