Russia-Ukraine : युद्धामुळे सर्वसामान्य रशियन जनता बेहाल

मॉस्को: रशियाने युक्रेनविरोधात युद्ध पुकारण्याचा एकतर्फी निर्णय घेतल्यानंतर तेथील जनतेचे मात्र प्रचंड हाल होत आहेत. अमेरिकेसह युरोपीय देशांनी रशियावर कठोर आर्थिक निर्बंध लादले असून यामुळे सामान्य जनता होरपळू लागली आहे. संपूर्ण रशियातील बॅंकींग व्यवस्था ठप्प झाली असून डॉलरच्या तुलनेत रशियन रूबलचे अवमूल्यन होताना दिसत आहे. देशातील एटीएम रिकामे झाले असून आंतरराष्ट्रीय गुंतवणूकदारांनीही रशियाकडे पाठ फिरवली आहे.

आर्थिक संकट

रशियामध्ये देशांतर्गत बेरोजगारी वाढण्याची भीती

अनेक बॅंका, वित्तीय संस्था दिवाळखोरीच्या वाटेवर

मॉस्कोच्या रोखे बाजारावर अस्थिरतेची छाया

निर्बंधामुळे आयात- निर्यात व्यापारासही फटका

कमकुवत घटक कर्जबाजारी होण्याची भीती

रशियावर मंदीची छाया

रशियामध्ये सध्या अराजकसदृश्य स्थिती निर्माण झाली असून हा देश लवकरच महामंदीच्या तडाख्यात सापडू शकतो अशी भीती आर्थिकक्षेत्रातील जाणकार व्यक्त करत आहेत. लोकांची बॅंकांमधील जमापुंजी संकटात सापडली असून प्रत्येकजण चलन मिळविण्यासाठी रस्त्यांवर धावताना दिसतो आहे.