युक्रेनच्या जवानांनी युद्धभूमीवरच उडवून दिला लग्नाचा बार

रशिया आणि युक्रेन (Russia Ukraine War) यांच्यात गेल्या 11 दिवसांपासून तुंबळ युद्ध सुरू आहे. रशियाने युक्रेनवर चारी बाजूंनी हल्ला केल्यानंतर युक्रेनमधील सर्व शहरात गोळीबार आणि बॉम्ब शेलिंग सुरू झाले आहे. अशा अनिश्चिततेच्या वातावरणात रविवारी युक्रेनच्या जवानाने (Ukraine soldiers) आपली लग्नगाठ (Marriage) बांधली. सध्या या युद्धभूमीवरच्या लग्नाची चर्चा सर्वत्र रंगली आहे.

कीव्ह पोस्ट (Kyivpost) या ट्विटर हँडलवरून या लग्नाचा फोटो शेअर करण्यात आला आहे. लेसा आणि व्हालेरिय या 112 ब्रिगेड सीमा सुरक्षा दलातील दोघांनी लग्नगाठ बांधली. कीव्ह पोस्टने या दोघांच्या लग्नाचा फोटो शेअर करत त्याला 'आज युक्रेन आणि रशिया यांच्यात युद्ध सुरू असताना सीमा सुरक्षा दलातील 112 ब्रिगेडच्या लेसा आणि व्हालेरिय यांनी लग्न केले. लष्करातील एका धर्मगुरूने त्यांचे लग्न लावून दिले.' असे कॅप्शन दिले.

काही दिवसांपूर्वीच युक्रेनमधील ओडेसा येथील जोडपे क्लेव्हेट्स आणि नतालिया व्लादिस्लेव्ह यांनी बॉम्ब शेल्टरमध्ये लग्न केले होते. याबाबतचे काही फोटो बेलारूसच्या माध्यमांमध्ये झळकले होते. दरम्यान, रशियाने व्हिनेत्सिया विमानतळ बेचिराख करून टाकले आहे. युक्रेनचे राष्ट्राध्यक्ष झेलेन्सकी यांनी इतर देशांकडे युक्रेनला नो फ्लाईंग झोन घोषित करण्याची मागणी केली आहे. नाटोने हा प्रस्ताव नाकारला आहे.