Earthquake Iran : भूकंपानं इराणची धरती हादरली; सात जणांचा मृत्यू, तब्बल 440 जण जखमी

तेहरान : तुर्की-इराण सीमेजवळील (Turkey-Iran Border) वायव्य इराणच्या पश्चिम अझरबैजान (West Azerbaijan) प्रांतातील खोय शहराला शनिवारी रात्री 5.9 तीव्रतेच्या भूकंपाचा (Earthquake In Iran) धक्का बसला.

रॉयटर्सनं दिलेल्या माहितीनुसार, भूकंपामुळं इराणच्या प्रांतीय राजधानीत अनेक घरांचं नुकसान झालंय. इराणी मीडिया आणि युरोपियन भूमध्य भूकंप विज्ञान केंद्रानं (EMSC) याबाबत माहिती दिलीये. मात्र, इराणच्या IRNA या वृत्तसंस्थेच्या वृत्तानुसार यात कोणतीही जीवितहानी झाल्याची माहिती नाही.

रॉयटर्सनं आपत्कालीन सेवा अधिकार्‍यांच्या हवाल्यानं सांगितलं की, अझरबैजान प्रांतातील खोय शहरात झालेल्या भूकंपात सात जणांचा मृत्यू झाला असून 440 जण जखमी झाले आहेत. भूकंपामुळं खोय शहरातील काही इमारतींचं नुकसान झालं, असं फार्स वृत्तसंस्थेनं सांगितलं.

EMSC नं सांगितलं की, भूकंपाची तीव्रता रिश्टर स्केलवर 5.6 एवढी होती आणि त्याचा केंद्रबिंदू 10 किमी खोलीवर होता. इराणी मीडियानं (Iranian Media) इराणी अधिकाऱ्यांच्या हवाल्यानं सांगितलं की, भूकंपग्रस्त भागात बचाव पथकं पाठवण्यात आली आहेत, तर रुग्णालयांना हाय अलर्टवर ठेवण्यात आलं आहे.