पॉप स्टार आर्यना सईदने सांगितलं अफगाणिस्तानचं धक्कादायक वास्तव

काबूल: "तालिबानने (Taliban) सरकार स्थापनेचा जो प्रस्ताव दिलाय, त्याला जगाने मान्यता देऊ नये. ते लोकांना खासकरुन महिलांना मानवीय वागणूक देत नाही" असे अफगाणि पॉप स्टार आर्यना सईदने (Aryana Sayeed) म्हटले आहे. अफगाणिस्तान तालिबानच्या नियंत्रणाखाली जाताच आर्यना सईदने देश सोडला. "२० वर्षापूर्वी आपण ज्या तालिबानचा अनुभव घेतला, ती माणस नव्हती. ते लोकांना मानवीय वागणूक देत नाही. खासकरुन महिलांना" असे आर्यना सईदने म्हटलय.

"काही दिवसातच जगाने अफगाणिस्तानला तालिबानच्या हातात कसं सोडून दिलं? याचं आश्चर्य वाटतं. महिलांना त्यांच्या जीवाची चिंता आहे. संपूर्ण अफगाणिस्तातून लोक काबुलमध्ये दाखल होत आहेत. त्यांना कुठेही आसरा नाहीय, अन्न नाहीय" अफगाणि जनतेची ही वेदनादायी स्थिती आर्यना सईदने जगासमोर मांडलीय. इंडिया टुडेला तिने ही माहिती दिली.

"अलीकडेच तालिबानने सरकार चालवण्यासाठी काही सुधारणा घडवण्याचे आश्वासन दिलेय. पण सरकारला जागतिक समुदायाकडून मान्यता मिळवण्यासाठी त्यांचा हा प्रयत्न आहे" असे आर्यना सईद म्हणाली. "माझा तालिबानवर अजिबात विश्वास नाही. नवीन अफगाण सरकारला जगाकडून मान्यता मिळावी, त्यासाठी ते हे सर्व करत आहेत. जगाकडून त्यांना मान्यता मिळणार नाही" अशी अपेक्षा असल्याचे आर्यनाने सांगितले.

"मी अनेक वर्षांपासून तालिबानच्या निशाण्यावर आहे असे आर्यना सईद म्हणाली. अमेरिकन लष्कराच्या मदतीने १६ ऑगस्टला मी कशीबशी C-17 विमानातून निसटण्यात यशस्वी ठरले. आता मी वॉशिंग्टन डीसीमध्ये आहे. पण अजूनही माझं मन अफगाणि जनतेला होणाऱ्या यातनांमुळे दु:खी आहे" असे आर्यना सईदने सांगितले.