शस्त्र बाजारात अमेरिका,चीनचे वर्चस्व; शस्त्र विक्रीत ८.५ टक्के वाढ

स्टॉकहोम - जागतिक राजकारणात अमेरिकेच्या बरोबरीने वर्चस्व गाजविण्याचा प्रयत्न चीन करत असतानाच शस्त्र बाजारातही या दोन देशांनी वर्चस्व राखल्याचे दिसून आले आहे. बड्या शस्त्र उत्पादक देशांमध्ये प्रथमच आखाती देशांचे नावही ठळकपणे दिसून आले आहे. 

देशभरातील इतर बातम्या वाचण्यासाठी येथे क्लिक करा

स्टॉकहोम इंटरनॅशनल पीस रिसर्च इन्स्टिट्यूट (सिप्री) या संस्थेने गेल्या वर्षातील शस्त्र व्यवहारांचा अभ्यास करत अहवाल प्रसिद्ध केला आहे. शस्त्र बाजारपेठेतील चीनचा वाटा वाढला असला आणि हा देश दुसऱ्या क्रमांकावर असला तरी अमेरिकेशी तुलना करता त्यांच्यातील अंतर बरेच आहे. शस्त्र उत्पादनात जगातील पहिल्या २५ देशांच्या एकूण उत्पादनापैकी एकट्या अमेरिकेचा वाटा ६१ टक्के आहे, तर चीनचा वाटा १५.७ टक्के आहे. या ‘टॉप २५’ देशांकडून झालेल्या विक्रीमध्ये ८.५ टक्क्यांनी वाढ झाली असून एकूण रक्कम ही संयुक्त राष्ट्रांच्या शांतता मोहिमांसाठी येणाऱ्या खर्चाच्या ५० पट अधिक आहे. शस्त्र विक्रीत आघाडीवर असलेल्या पहिल्या दहा कंपन्यांमध्ये अमेरिकेतील सहा, तर चीनमधील तीन कंपन्यांचा समावेश आहे. ब्रिटनमधील ‘बीएई सिस्टीम’ ही कंपनी यादीत सातव्या क्रमांकावर आहे. 

जगभरातील इतर बातम्या वाचण्यासाठी येथे क्लिक करा

गेल्या अनेक दशकांपासून जागतिक शस्त्र बाजारावर केवळ अमेरिकेचेच वर्चस्व आहे. मात्र, गेल्या आर्थिक वर्षांत चीनमधील कंपन्यांच्या विक्रीत ५ टक्क्यांनी वाढ झाली. चिनी सैन्याने २०१५ पासून आधुनिकीकरणाकडे लक्ष देण्यास सुरुवात केली असल्याने ही वाढ झाली आहे. युरोपमधील देशांचा स्वतंत्रपणे विचार केल्यास त्यांचे वर्चस्व दिसत नाही. मात्र, युरोपीय कंपन्या म्हणून त्यांच्याकडे पाहिल्यास त्यांचा वाटाही अमेरिकेच्या तोडीचाच असल्याचे तज्ज्ञांनी सांगितले. भारताबरोबर राफेल लढाऊ विमानांचा करार झाल्याने फ्रान्समधील डसॉल्ट कंपनीचे यादीतील स्थान ३८ वरून थेट १७ वर आले आहे. रशियाच्याही दोन कंपन्या पहिल्या २५ मध्ये आहेत.

ताज्या बातम्यांसाठी डाऊनलोड करा ई-सकाळचे ऍप

पुण्याच्या बातम्या वाचण्यासाठी येथे ► क्लिक करा