लादेनची मुलाखत घेणारे ज्येष्ठ आंतरराष्ट्रीय पत्रकार रॉबर्ट फिस्क यांचे निधन

डब्लिन (आयर्लंड) -  अल-कायदा या दहशतवादी संस्थेचा संस्थापक ओसामा बिन लादेन याची मुलाखत घेणारे व पश्‍चिम आशियातील महत्त्वाच्या आंतरराष्ट्रीय घडामोडींचे वार्तांकन करणारे ज्येष्ठ पत्रकार रॉबर्ट फिस्क (वय ७४) यांचे हृदयविकाराच्या झटक्याने निधन झाले. फिस्क यांची बरे वाटत नसल्याने त्यांना शुक्रवारी (ता. ३०) डब्लिन येथील रुग्णालयात दाखल केले होते. रविवारी (ता.१) त्यांचे निधन झाले, अशी माहिती आयरिश टाईम्स’ने दिली. 

फिस्क यांनी १९७०मध्ये पत्रकारितेला सुरुवात केली. पश्‍चिम आशियावरील बातम्यांबद्दल त्यांना अनेक पुरस्कार मिळाले होते. पण अमेरिका, इस्राईल आणि पश्‍चिमेकडील परराष्ट्र धोरणावर त्यांनी केलेल्या टीकेबद्दल वादही झाले. ब्रिटनमधील दैनिकांसाठी फिस्क यांनी बाल्कन देश, पश्‍चिम आशिया आणि उत्तर आफ्रिकेतील युद्धाचे वार्तांकनही केले होते. ‘ब्रिटनमधील सर्वांत प्रसिद्ध विदेशी पत्रकार’, असा त्यांचा गौरव न्यूयॉर्क टाईम्सने २००५मध्ये केला होता.

हे वाचा - Turkey earthquake : ७० वर्षीय नागरिक ढिगाऱ्यातून सुखरूप बाहेर

फिस्क यांचा जन्म मेडस्टोनमधील केन्ट येथे १९४६मध्ये झाला. त्यांनी नंतर आयर्लंडचे नागरिकत्व स्वीकारले होते. आयरिश अध्यक्ष मायकेल डी हिगिन्स यांनी फिस्क यांच्या निधनाबद्दल दुःख व्यक्त केले. ‘द ग्रेट वॉर ऑफ सिव्हिलायझेशन- द कॉन्क्वेस्ट ऑफ द मिडल इस्ट’ या पुस्तकात त्यांनी अमेरिका, ब्रिटन आणि इस्राईलच्या धोरणांवर टीका केली आहे.

लाजाळू ओसामा
फिस्क यांनी ‘द इंडिपेंडट’साठी १९९०च्या दशकात ओसामा बिन लादेनची तीन वेळा मुलाखत घेतली होती. १९९३ मधील पहिल्या मुलाखतीत ओसामा हा लाजाळू असल्याचे व मुहिदिनांसाठी लढणारा पहाडी योद्ध्याच्या रूपात तो दिसत असल्याचे वर्णन त्यांनी केले होते. लादेनने अमेरिकेतील ट्विन टॉवरवर ११ सप्टेंबर रोजी केल्यानंतर फिस्क यांनी पुढील दोन दशके पश्‍चिम आशियातील संघर्ष हा त्यांच्या बातमीदारीचा विषय होता.