हिंसाचारप्रकरण : महिंदा राजपक्ष यांची तीन तास चौकशी

कोलंबो : आर्थिक अडचणीत असलेल्या श्रीलंकेत ९ मे रोजी उसळलेल्या हिंसाचारप्रकरणी श्रीलंकन पोलिसांनी माजी पंतप्रधान महिंदा राजपक्ष यांची तीन तास इन कॅमेरा चौकशी केली आणि जबाब नोंदवून घेतला. या हिंसाचारात दहा नागरिक ठार झाले आणि २०० हून अधिक जखमी झाले होते. नऊ मे रोजी महिंदा राजपक्ष यांच्या समर्थकांनी शांततेच्या मार्गाने आंदोलन करणाऱ्या नागरिकांवर हल्ले केले. यानंतर नागरिकांनी प्रतिहल्ले सुरू केले आणि त्यात सरकारी मालमत्तेची नासधूस करण्यात आली.

ठिकठिकाणी झालेल्या हिंसाचारात दोनशेहून अधिक जखमी झाले होते. याच दिवशी पंतप्रधानांचे सरकारी निवासस्थान असलेल्या कोलूपिटिया आणि गॅले फेस ग्रीन येथे झालेल्या हिंसाचारप्रकरणी काल गुन्हे तपास खाते (सीआयडी) ने महिंदा राजपक्ष यांचा जबाब नोंदवून घेतला.

आज मुलाचीही चौकशी

श्रीलंका सुरक्षा मंत्रालयाचे वरिष्ठ अधिकारी आणि पोलिस खात्याचे प्रमुख यांनी काल राजीनामा दिला आहे. गेल्या आठवड्यात श्रीलंकेच्या सीआयडी पथकाने सत्ताधारी एसएलपीपी संसदीय गटाच्या तीन सदस्यांची चौकशी केली होते. हे सदस्य हिंसाचारात सहभागी असल्याचा ठपका आहे. यापैकी दोघांना अटक करण्यात आली आली होती. उद्या (ता.२७) माजी मंत्री आणि महिंदा राजपक्ष यांचे चिरंजीव नमाल राजपक्ष यांचीही चौकशी केली जाणार असून त्यांना तशी नोटीस बजावली आहे.