Jalgaon Crime News : सार्वजनिक ठिकाणी धूम्रपान करणाऱ्यांवर आरोग्य व‍िभागाच्या पथकाची कारवाई

Jalgaon Crime News : सार्वजन‍िक ठ‍िकाणी धूम्रपान करणे गुन्हा असतानाही सर्रास त्याचे उल्लंघन केले जाते.

शहरातील सार्वजनिक ठिकाणी धूम्रपान करणाऱ्या ३४ जणांवर ज‍िल्हा आरोग्य व‍िभागाच्या पथकाने बुधवारी (ता. १३) दंडात्मक कारवाई करत सहा हजारांचा दंड वसूल केला. (Action by health department team against smokers in public places jalgaon crime news )

शहरात तंबाखू व अन्य तंबाखूजन्य उत्पादने कायदा-२००३ कायद्यान्वये सार्वजनिक ठिकाणी धूम्रपान करणाऱ्यांवर कारवाईसाठी जिल्हास्तरीय अंमलबजावणी पथक स्थापन करण्यात आले आहे.

या पथकाचे सदस्य सच‍िव जिल्हा शल्यचिकित्सक किरण पाटील यांच्यासह भरारी पथकात राज्य शुल्क विभागाचे दुय्यम निरीक्षक चिंतामण कंखरे, डॉ. आकाश चौधरी, संदीप पाटील, समुपदेशक निशा कटरे, दंत सहायक राकेश पाटील, डॉ. उल्हास इंगळे, संपदा गोस्वामी, अनिल गुंजे, राहुल बारहाटे, रुचिका पवार, अन्न सुरक्षा अधिकारी शरद पवार यांच्या पथकाने ही कारवाई केली.

मोहिमेची सुरवात जळगाव जिल्हा रुग्णालय येथून झाली. पांडे चौक परिसर, भजे गल्ली, बसस्थानक परिसर, राज्य उत्पादन शुल्क विभाग कार्यालय परिसर, बी. जे. मार्केट आदी ठिकाणी ही कारवाई करण्यात आली. ही कारवाई सुरूच राहणार असल्याचे सांगण्यात आले.