अबब! कलेक्टर बंगल्या समोरच वाहनावर हल्ला; मद्यधुंद दारुड्यांचा धिंगाणा

जळगाव : शहरातील सर्वाधिक सुरक्षीत समजला जाणारा व्हीव्हीआयपी परिसर असलेल्या अजिंठा विश्रामगृहासमोरच शनिवारी (ता. १६) रात्री एका वाहनावर चार-पाच दारुड्यांनी हल्ला चढवला. वाहनातील तरुणींसह चालक आणि इतर लोकांना शिवीगाळ करत वाहनाची तोडफोड केली. तब्बल अर्धातास हा तमाशा सुरु असताना कोणीही मदतीला धावून आले नाही. पोलिसांनी या प्रकरणात अज्ञातांवर अदखलपात्र गुन्हा नोंदवून बोळवण केली. (Latest Marathi News)

जळगाव शहरातील मोकाट कुत्र्यांना अँटीरेबीज लसीकरण करण्यासाठी पशुपापा संघटनेतर्फे मोहीम राबवली जात आहे. संघटनेचे स्वयंसेवी कार्यकर्ते शहरातील विविध ठिकाणाहून मोकाट कुत्र्यांना पकडून त्यांना अँटीरेबीजची लस टोचून पुन्हा सोडून देतात. जळगावकरांसाठी आणि समाज हितासाठी ही संघटना व तिचे कार्यकर्ते अहोरात्र कुठल्याही अपेक्षेशिवाय कार्य करत आहेत. संघटनेतर्फे शहरात सर्व सेवांनी सज्ज असे चालतेफिरते रुग्णालय वजा प्रयोगशाळा असलेले महागडे वाहन(व्हॅन) मागवण्यात आले आहे.

कुत्र्यांना पकडून साफसफाई केल्यावर त्यांना लसीकरण करण्यासाठी आवश्यक सर्व साहित्य आणि तज्ज्ञ या वाहनासोबत असतात. लसीकरणाचे काम करत असताना शहरात सर्वात सुरक्षीत समजल्या जाणाऱ्या परिसरातील जिल्हा पोलिस अधीक्षक डॉ. प्रवीण मुंढे यांच्या निवासस्थानाकडून जिल्‍हाधिकारी अभिजित राऊत यांच्या निवासस्थानाकडे जात असताना शनिवारच्या रात्री अकरा वाजता ५-६ टवाळखोरांनी हे वाहन थांबवले. काहीएक विचारणा न करता शिवीगाळ दमदाटी करत वाहनावर हल्ला चढवून वाहन फोडण्यात आले. भयभीत झालेल्या तरुणी आणि कार्यकर्त्यांनी पोलिसांना फोन केला. पोलिस आलेही त्यांनी तक्रारीसाठी पोलिस ठाण्यात नेत अज्ञात संशयितांविरुद्ध अदखलपात्र गुन्हा नोंदवला.