Jalgaon Crime News : तडीपार गुन्हेगाराचा आसोद्यात गोळीबार

Jalgaon Crime News : तालुक्यातील आसोदा येथे शुक्रवारची पहाट गोळीबाराच्या घटनेने उजाडली. पूर्ववैमनस्य असलेल्या शत्रूला हॉस्पिटलमध्ये ॲडमिट केल्याचा राग आल्याने जिल्हा बंदी असलेल्या सराईत गुन्हेगार चेतन ऊर्फ चिंग्या सुरेश आळंदे (रा. गणेशवाडी) याने गोळीबार करीत अन्य तरुणावर प्राणघातक हल्ला केला. (Firing of criminal in Asoda jalgaon crime news)

ही घटना हॉटेल आर्यासमोर घडली. दरम्यान, स्थानिक गुन्हे शाखेच्या पथकाने चेतन आळंदे याच्यासह त्याचा साथीदार केयूर कैलास पंदाणे (रा. शिवाजीनगर) यांना तत्काळ जेरबंद केले.

पूर्ववैमनस्यातून घटना

असोदा येथील योगेश दिगंबर कोल्हे याचा मित्र ललीत ऊर्फ सोनू गणेश चौधरी (रा. लाठी शाळेजवळ, गणेशवाडी) याच्यावर तीन ते चार महिन्यांपूर्वी लखन ऊर्फ सोनू चौधरी याने शिवाजी पुतळ्याजवळ वार करून गंभीर जखमी केले होते.

त्यावेळी जखमी ललित ऊर्फ सोनू चौधरी याला योगेश कोल्हे याने सिव्हिल हॉस्पिटलमध्ये दाखल केले होते. त्यावेळी चेतन ऊर्फ चिंग्या याच्या काही मित्रांनी त्याला उपचारासाठी दाखल करताना पाहिले होते. त्याचाच राग मनात धरून चेतन ऊर्फ चिंग्या योगेशला नेहमी फोन करून ठार मारण्याची धमकी देत होता.

हेही वाचा : संतुलित आहारातून रोखा फॅटी लिव्हरचा आजार

अशी घडली घटना

शुक्रवारी रात्री दोनच्या सुमारास योगेश हॉटेल आर्याबाहेर असलेल्या सिमेंटच्या कट्ट्यावर बसला असताना, त्याला अचानक बंदुकीच्या गोळ्या झाडल्याचा आवाज आला. त्याने रोडवर येऊन बघितले असता, त्यांना समोरून दोन इसम दुचाकीवर त्याच्याजवळ आले. त्यांनी योगेशजवळ दुचाकी थांबवून केयूर पंदाणे हा त्याच्याजवळ पळत आला. त्याने योगेशला पकडून ठेवत चिंग्या याला जिवंत सोडू नको, त्याला गोळ्या घाल, अशी चिथावणी दिली.

वार चुकवल्यानंतर पाठलाग

चेतन उर्फ चिंग्या याने त्याच्याकडील बंदुक योगेशच्या दिशेने रोखून ‘तुला आज जिवंत सोडणार नाही’, असे म्हणत त्याच्यावर गोळी झाडली. योगेशने प्रसंगावधान राखत केयूरला धक्का दिल्यामुळे चिंग्याचा नेम चुकविला आणि केयूरला जोरात धक्का देऊन योगेश कोल्हे तेथून पसार झाला. चिंग्या व केयूर यांनी काही अंतरापर्यंत त्याचा पाठलाग केला. मात्र, तो मिळून न आल्याने चिंग्या व त्याचा साथीदाराने तेथून पळ काढला.

गुन्हा दाखल अन्‌ तत्काळ अटक

ठार मारण्यासाठी गोळीबार झाल्यामुळे योगेश कोल्हे प्रचंड घाबरून गेला होता. त्याने घडलेली घटना कुटुंबियांना सांगितली. त्याच्यासह कुटुंबियांनी शुक्रवारी सकाळी तालुका पोलिस ठाण्यात पोलिसांत तक्रार दिली. त्यावरून चेतन ऊर्फ चिंग्या सुरेश आळंदे व केयूर कैलास पंदाणे या दोघांविरुद्ध गुन्हा दाखल झाला आहे. स्थानिक गुन्हे शाखेच्या पथकाने वाकटुकी शिवारातून दोघांच्या मुसक्या आवळल्या.