उच्च रक्तदाबाला कंट्रोल करणार फॉर्म्युला

जळगाव - कवयित्री बहिणाबाई चौधरी उत्तर महाराष्ट्र विद्यापीठाच्या रासायनिक तंत्रज्ञान संस्थेचे संचालक प्रा. जितेंद्र नाईक, औरंगाबादचे डॉ. आनंद कुलकर्णी आणि वाशिमच्या विदर्भ इन्स्टिट्यूट ऑफ फार्मसीचे संचालक डॉ. संजय तोष्णीवाल यांनी उच्च रक्तदाबाच्या आजारावर उपचार करण्यासाठी विकसित केलेल्या टॅबलेटच्या फॉर्म्युल्यावरील संशोधनाला भारतीय पेटंट प्राप्त झाले आहे. (How to Control High Blood Pressure)

उच्च रक्तदाब हा जुनाट आजार असून भारतात दरवर्षी उच्च रक्तदाबामुळे हृदयरोग व हृदयविकार होऊन मृत्यू होण्याचे प्रमाण अधिक आहे. योग्य पद्धतीने काळजी घेतली तर उच्च रक्तदाब नियंत्रणात राहू शकतो.

असे आहे संशोधन

प्रा. नाईक, डॉ. कुलकर्णी व तोष्णीवाल यांनी उच्च रक्तदाबाच्या आजारावर उपचार करण्यासाठी नवीन फॉर्म्युला विकसित केला आहे. तो शाश्वत स्वरूपाचा आहे. सध्या रक्तदाब असणाऱ्या व्यक्तींना दिवसांतून दोन अथवा तीन वेळा गोळ्या घ्याव्या लागतात.

अशी आहे उपयुक्तता

या संशोधनात जो फॉर्मुला विकसित केला आहे, त्यात एकवेळा ही टॅबलेट घेतली तरी २४ तास त्याचा प्रभाव कायम राहू शकतो. हृदय विकाराचा झटका आणि मूत्रपिंडाच्या समस्या टाळण्यास त्यामुळे मदत होणार आहे. या फॉर्मुल्याला भारत सरकारकडून पेंटट प्राप्त झाले आहे.