मेहुणबारे (ता. चाळीसगाव) : शेतजमीन नावावर करण्यासाठी पाच हजार रुपयांची मागणी करणाऱ्या चाळीसगाव तालुक्यातील बोरखेडा येथील तलाठ्यासह कोतवाल यांना जळगावच्या लाचलुचपत प्रतिबंधक पथकाने रंगेहात पकडले.
या कारवाईने महसूल विभागात एकच खळबळ उडाली आहे. या प्रकरणी चाळीसगाव ग्रामीण पोलिस ठाण्यात लाचखोर तलाठ्यासह कोतवालाच्या विरोधात गुन्हा दाखल करण्यात आला आहे.
बोरखेडा बुद्रुक येथील तक्रारदाराच्या वडिलांनी केलेल्या मृत्यूपत्रान्वये तक्रारदार यांच्या नावे बोरखेडा बुद्रुक येथील शेतजमीन केलेली आहे. तक्रारदार यांच्या हिश्‍श्‍यावर एकूण तीन गट वाटणीस आलेले आहेत. सदर तीन गटांपैकी ६४/२ ही शेतजमीन तक्रारदार यांना त्यांच्या पत्नीच्या नावे करायची आहे. (Latest Marathi News)
जेणेकरून ते अल्पभूधारक म्हणून गणले जातील म्हणून नोव्हेंबर २०२१ मध्ये बोरखेडा तलाठी ज्ञानेश्वर सूर्यभान काळे (वय ५०, रा. शिवशक्तीनगर, भडगाव रोड, चाळीसगाव) यांनी सांगितल्याप्रमाणे हे प्रकरण सादर केले. सदर शेती पत्नीच्या नावे करण्यासाठी तलाठी काळे यांनी यापूर्वी देखील तक्रारदाराकडून सात हजार रुपये घेतलेले आहे.
तरी देखील काम न झाल्यामुळे तक्रारदार तलाठ्याला कार्यालयात जावून भेटले असता तलाठ्याने तक्रारदाराच्या नावे असलेली शेतजमीन पत्नीच्या नावे करण्याच्या मोबदल्यात सात हजार रुपयांची मागणी केली. (Marathi Tajya Batmya)
तडजोडीअंती पाच हजार रुपये देण्याचे ठरले. तलाठी काळे यांनी कोतवाल किशोर गुलाबराव चव्हाण (वय ३७, रा. श्रीकृष्णनगर, चाळीसगाव) यांच्यामार्फत तक्रारदाराला रक्कम देण्यास सांगितले.
मात्र तक्रारदाराने लाचलुचपत प्रतिबंधक विभाग, जळगाव यांच्याकडे तक्रार केली. ही मागणी केलेली लाच रक्कम तलाठ्यांनी गुरुवारी (ता.२३) स्वतः स्वीकारताना त्यांना रंगेहाथ पकडण्यात आले आहे. त्यांच्यावर चाळीसगाव ग्रामीण पोलिस ठाण्यात गुन्हा दाखल करण्यात आला आहे.
ही कारवाई लाचलुचपत प्रतिबंधक विभागाचे पोलिस उपअधीक्षक शशिकांत पाटील, पोलिस निरीक्षक श्रीमती एन. एन. जाधव यांच्या मार्गदर्शनाखाली पोलिस कर्मचारी संजोग बच्छाव, ईश्वर धनगर, राकेश दुसाने, सचिन चाटे यांनी केली.
तर कारवाईसाठी नेमलेल्या मदत पथकात सहाय्यक फौजदार दिनेशसिंग पाटील, सहाय्यक फौजदार सुरेश पाटील, पोलिस कर्मचारी अशोक अहिरे, सुनील पाटील, रवींद्र घुगे, शैला धनगर, जनार्दन चौधरी, किशोर महाजन, सुनील वानखेडे, बाळू मराठे, प्रदीप पोळ, अमोल सूर्यवंशी, प्रणेश ठाकूर यांचा समावेश होता.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
