3 स्टार हॉटेलात 2 महिने जेवणासह रिचवली दारू; पैसे मागताच पसार | Jalgaon latest news | Sakal
sakal

बोलून बातमी शोधा

Money

3 स्टार हॉटेलात 2 महिने जेवणासह रिचवली दारू; पैसे मागताच पसार

जळगाव : शहरातील हॉटेल महिंद्रामध्ये तब्बल दोन महिने वास्तव्य. या काळात जेवणासह दारूही रिचवली. मात्र हॉटेलचे तब्बल पावणेदोन लाख रुपयांचे बिल न देता हॉटेलमालकाची फसवणूक करून कथित पुण्यातील कंपनीचा व्यवस्थापक पसार झाल्याची घटना घडली. एमआयडीसी पोलिस ठाण्यात संशयित व्यवस्थापक मयूर अशोक जाधव याच्याविरुद्ध गुन्हा नोंदविण्यात आला आहे. (Manager absconding after cheating in Mahendra Hotel jalgaon)

पैशांसाठी तगादा लावताच पसार

एमआयडीसी पोलिसांनी दिलेल्या माहितीनुसार, शहरातील अजिंठा चौकातील नामवंत थ्री स्टार हॉटेल महिंद्रा येथे १४ फेब्रुवारी ते १६ एप्रिलदरम्यान मयूर अशोक जाधव (रा. फ्लॅट नं. ४, श्रीगणेश ऑर्किड, गंगापूर रोड, रामेश्वरनगर, आनंदवली, नाशिक) याने पुण्यातील एका कंपनीत व्यवस्थापक असल्याचे सांगत बस्तान मांडले होते. वास्तव्यास असलेल्या दोन महिन्यांच्या कालावधीत हॉटेल कर्मचाऱ्यांचा विश्वास संपादन केला. चविष्ट जेवणासह महागडी दारू रिचवली. तो राहत असलेल्या काळात त्याच्या नावाने हॉटेलचे एक लाख ८९ हजार ५९० रुपये बिल झाले. बिलासाठी हॉटेल व्यवस्थापक, कर्मचाऱ्यांनी त्याला तगादा लावला असता, मयूर जाधव याने बिलाच्या रकमेचा धनादेश दिला. मात्र, तो वठलाच नाही. त्यानंतरही मयूरकडे हॉटेलमधील कर्मचाऱ्यांनी बिलाबाबत पुन्हा तगादा लावला.

हेही वाचा: मद्याच्या नशेत गेला झोल; गोलाणीत छतावरून पडून तरुण ठार

दरम्यान, १६ एप्रिलला मयूर जाधव हॉटेलातील खोलीची चावी सोबत नेत पसार झाला. मयूर जाधव याने फसवणूक केल्याची खात्री झाल्यावर हॉटेलमालक तजेंद्रसिंग अमितसिंग महिंद्रा (वय ६५, रा. जुनी जैन कंपनी, निमखेडी रोड, जुना हायवे रोड, जळगाव) यांनी एमआयडीसी पोलिसांत तक्रार दिली. त्यावरून मयूर जाधव यांच्याविरोधात गुन्हा दाखल करण्यात आला आहे. पोलिस नाईक इम्रान सय्यद तपास करीत आहेत..

हेही वाचा: जळगाव : जिल्हा रुग्णालयातील मारहाण प्रकरणी चार पोलिस निलंबित

Web Title: Manager Absconding After Cheating Rs 2 Lakh In Mahendra Hotel Jalgaon

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :JalgaonFraud Crime
go to top