जळगाव : कांदा बारदानाचे पैसे कपात नाही; बाजार समितीचे निर्देश

जळगाव : कांदा उत्पादक शेतकऱ्यांकडून कांदा खरेदी करताना कांदा प्लास्टिक बारदानाचे पैसे कपात न करण्यासंबंधीचे निर्देश जळगाव कृषी उत्पन्न बाजार समितीने व्यापाऱ्यांना दिले आहेत.

गेल्या काही दिवसांपासून कांद्याचे भाव घसरले असून कांदा मातीमोल किमतीने विकला जात आहे. त्यामुळे कांदा उत्पादक शेतकरी अडचणीत आला आहे. त्यातच कांद्याच्या प्लास्टिक बारदानाची रक्कमही खरेदीदार व्यापारी कापून घेत होते. याबाबत बाजार समितीच्या फळे व भाजीपाला मार्केटमध्ये कांदा खरेदीदारांची बैठक घेण्यात आली. या बैठकीत त्यांना बारदानाचे पैसे कापण्यात येऊ नये, अशी सूचना देण्यात आली. व्यापाऱ्यांनी या निर्णयास संमती दर्शवली असून काही प्रमाणात का होईना कांदा उत्पादकांना दिलासा मिळाला आहे.