जळगाव जिल्ह्यात सव्वादोन लाखांवर बेरोजगार

जळगाव : जिल्हा कौशल्य विकास, रोजगार व उद्योजकता मार्गदर्शन केंद्रात यंदा तब्बल २ लाख १९ हजार ५६२ बेरोजगारांनी रोजगार, स्वयंरोजगाराचे प्रशिक्षण मिळावे यासाठी अर्ज केले आहेत. त्यातील ९९१ जणांना आरोग्य क्षेत्रातील रोजगारावर आधारित प्रशिक्षण देण्यात आले. दोन जणांना रोजगार मिळाला असून इतरांनी स्वयंरोजगार सुरू केला आहे.

अनेकांनी मिळविला स्वयं रोजगार

जिल्हा कौशल्य विकास, रोजगार व उद्योजकता मार्गदर्शन केंद्रातर्फे दरवर्षी रोजगाराबाबत मार्गदर्शन, प्रशिक्षण दिले जाते. कोविड काळात सर्वच बाबींवर निर्बंध असल्याने प्रशिक्षण शक्य नव्हते. कोरोना काळात वैद्यकीय क्षेत्रातील कर्मचाऱ्यांची कमतरता अधिक भासली. यामुळे यंदा कोरोना (वैद्यकीय) संबंधित प्रशिक्षण देण्यात येत आहे. मुख्यमंत्री महाआरोग्य कौशल्य विकास प्रशिक्षण योजनेअंतर्गत ६९१ जणांना नर्सिंग, जनरल ड्यूटी असिस्टंट बेसिक, ॲडव्हान्स, ड्रेसर, फेलोरोटोमिस्ट (लॅब सहाय्यक) आदी संवर्गातील प्रशिक्षण जिल्हा रुग्णालय, ग्रामीण रुग्णालयात देण्यात आले. यातील ४६६ प्रशिक्षणार्थी परिक्षेस पात्र झाले. तीस जण परिक्षा उत्तीर्ण झाले. कोरोना महामारीत ऑक्सिजन प्लांट प्रत्येक शासकीय रुग्णालयात उभारण्यात आले. त्यावर देखरेख ठेवणे, प्लांट सूरू करणे, बंद करणे, त्यांचे मेंटेनस ठेवणे याबाबतचे प्रशिक्षण तीस प्रशिक्षणार्थींना देण्यात आले. तर कस्टमाईस क्रॅश कोर्स (सीसीसीपी) अंतर्गत २७० जणांना प्रशिक्षण दिले. कोरोना काळात ज्या पदांच्या गरज भासली त्या पदांची प्रशिक्षणे या उपक्रमात देण्यात आली. यातून अनेकांनी स्वयं रोजगार मिळविला आहे.

''बेरोजगारांना स्वयंरोजगार अथवा रोजगार (नोकरी) देण्यासाठी विविध क्षेत्रात प्रशिक्षणाची गरज असते. ते आम्ही देतो. यातून बेरोजगारांना प्रॅक्टिकल ज्ञान मिळवून तो रोजगार, स्वयंरोजगार मिळवू शकतो. बेरोजगार युवकांनी आमच्या विभागातील प्रशिक्षणाचा लाभ घ्यावा.'' - विश्‍वनाथ मुकणे, सहाय्यक आयुक्त - कौशल्य विकास, रोजगार व उद्योजकता मार्गदर्शन केंद्र.