चांदीचे दर प्रतिकिलो एक लाखांवर जाणार?

जळगाव : सध्या लग्नसराई नसली तरी सोन्यापेक्षा चांदीचे दागिने व चांदीला (Silver)ग्राहकांकडून मोठी मागणी सुरू झाली आहे. आगामी काळात चांदीचे दर (Silver Rate)प्रतिकिलो एक लाखाच्यावर (One Lakh)जाणार असल्याचा अंदाज सोने (Gold)बाजारात व्यक्त केला जात आहे. यामुळे रोज पन्नास-साठ किलोने विकली जाणारी चांदी अचानक दोन दिवसांपासून शंभर ते दीडशे किलोपर्यंत विकली जात आहे.

पैशांची अडचण असली, की घरातील सोने, चांदी विकून पैसे करून घेण्याकडे अनेकांचा कल असतो. यामुळे अनेक जण सोने, चांदीत गुंतवणूक करतात. दर कमी झाले, की सोने-चांदी घेतात आणि भाव वाढले, की विकतात.

यामुळे खरेदी-विक्री दरतील फरक म्हणजे त्यांचा नफा असे गुंतवणूकदारांचे गणित असते. काही दिवसांपासून चांदीचे दर एक लाख प्रतिकिलो जातील, असा अंदाज सोने बाजाराने वर्तविला आहे. यामुळे नागरिकांची चांदीला मागणी वाढली आहे.

शहरासह जिल्ह्यातील सराफी दुकानात अचानक चांदीला मागणी वाढणी असल्याचे व्यावसायिक सांगतात. सध्या चांदीचा दर ६४ हजार प्रतिकिलो आहे. तोच दर जर एक लाखावर गेला, तर तेवढाच फायदा या आशेने ग्राहक चांदी खरेदी करीत आहे.

सध्या लग्नसराई नाही. खरेदी करणारे येताहेत. सोन्याच्या दागिन्यांसोबतच चांदीला अधिक मागणी होत आहे. रोजच्या विक्रीपेक्षा दुप्पट तर नाही. मात्र साठ टक्के ग्राहक चांदी घेण्यासाठी येत आहे.

-मनोहर पाटील, जनसंपर्क अधिकारी रतनलाल सी. बाफना ज्वेलर्स

चांदीच्या दरात वाढ होईल, या आशेने ग्राहकांची चांदीला मागणी वाढली आहे. मात्र ही वाढ होईल की नाही, हे येणारा काळच ठरवेल. चांदीचे दागिने, वीट खरेदीला ग्राहकांची चांगली पसंती आहे.

-भागवत भंगाळे, संचालक, भंगाळे गोल्ड