Jalgaon Crime News : चिनावलच्या तरुणाचा मुक्ताईनगरजवळ खून; मारेकऱ्यांचा शोध सुरू

Jalgaon Crime News : नवीन मुक्ताबाई मंदिराच्या मागे सातोड शिवारात बोदवड रस्त्यावर चिनावल (ता. रावेर) येथील तरुणाचा खून झाल्याची घटना मंगळवारी (ता. ६) सकाळी उघडकीस आली. (Ravindra Madhukar Patil was killed jalgaon crime news)

सातोड शिवारात मुक्ताईनगर ते बोदवड रस्त्यालगत असलेल्या नाल्यात वृंदावन हॉटेलजवळ मंगळवारी (ता. ६) दुपारी दोनपूर्वी दगड, टणक वस्तूंच्या व हत्याराच्या साह्याने मारहाण करून रवींद्र मधुकर पाटील (वय ४६) याचा खून केल्याची घटना घडली आहे. मारेकऱ्यांनी रवींद्रच्या तोंडावर, डोक्यावर, नाकावर व चेहऱ्यावर जबर मारहाण करून ठार मारले.

घटनास्थळी जिल्हा पोलिस अधीक्षक एम. राजकुमार, उपविभागीय पोलिस अधिकारी राजकुमार शिंदे, परीक्षाविधीन डीवायएसपी सतीश कुलकर्णी, पोलिस निरीक्षक राजेंद्र गुंजाळ, सहायक पोलिस निरीक्षक संदीप दोनगहू, पोलिस उपनिरीक्षक संदीप खेडे व पोलिस कर्मचारी व फॉरेन्सिक पथक दाखल होऊन तपासणी केली. संदीप दोनगहू तपास करत असून, मुक्ताईनगर पोलिसात खुनाचा गुन्हा दाखल करण्यात आला आहे.

हेही वाचा : Credit Card फसवणूक....काय घ्याल काळजी?

दरम्यान, मृत रवींद्र हा चिनावल येथील रहिवासी असून, तो पतसंस्थेमध्ये काम करत असल्याची माहिती मिळाली. त्याचे लग्न झालेले आहे व अपत्य देखील असल्याची माहिती मिळाली आहे.

त्याची मोटरसायकल मुक्ताईनगर शहरात आढळून आल्याची ही माहिती पोलिसांनी दिली. दरम्यान तो मुक्ताईनगर येथे कशासाठी आला व त्याचा खून कोणी व कोणत्या कारणासाठी केला, या बाबी अद्यापही अस्पष्ट असून पोलिस त्या दृष्टिकोनातून तपास करत आहेत.