Aditya Thackeray Jalgaon Daura : आदित्य ठाकरे उद्या जिल्हा दौऱ्यावर; 4 सभा घेणार

जळगाव : शिवसेना नेते आदित्य ठाकरे बुधवारी (ता.१४) जिल्हा दौऱ्यावर येत आहे. जळगावात सुभाष चौकात त्यांची जाहीर सभा होणार आहे. तसेच त्यांच्या उपस्थितीत जिल्ह्यातील महाविकास आघाडीतील पक्षाच्या नेत्यांची बैठक होण्याची शक्यता आहे.

वेळेअभावी बैठक न झाल्यास जिल्ह्यातील आघाडीच्या नेत्यांची भेट घेणार असल्याचे सांगण्यात आले. जिल्ह्यात ते चार सभा घेणार आहेत. (Shiv Sena leader Aaditya Thackeray is coming on jalgaon district tour news)

लोकसभा निवडणुकीनिमित्ताने आदित्य ठाकरे राज्यात दौरा करीत आहेत. महाविकास आघाडीच्या माध्यमातून जिल्ह्यातील लोकसभेच्या दोन्ही जागा लढविण्यात येणार आहेत.

त्यातील जळगाव लोकसभेची जागा लढविण्याची इच्छा शिवसेना ठाकरे गटातर्फे व्यक्त करण्यात आली आहे. त्या दृष्टीनेही त्यांची तयारी सुरू आहे.

जळगाव जिल्हा दौऱ्यात आदित्य ठाकरे महाविकास आघाडीच्या नेत्यांचीही बैठक होण्याची शक्यता आहे. परंतु ही बैठक झाली नाही तर महाविकासचे जे नेते भेट घेतील त्यांच्याशी चर्चा होणार आहे.

त्या शिवाय त्यांची जळगावातील सुभाष चौक येथे दुपारी बारा वाजता सभा होणार आहेत. त्यानंतर शिरसोली येथे दुपारी दोन वाजता, कासोदा येथे दुपारी चार वाजता तर भडगाव येथे सायकांळी सहा वाजता सभा होणार आहेत.

शहरातील व जिल्ह्यातील सभेसाठी शिवसेना जिल्हा व शहर प्रमुख शरद तायडे, जिल्हा प्रमुख विष्णू भंगाळे, माजी विरोधी पक्षनेते सुनील महाजन, उपमहापौर कुलभूषण पाटील आदी तयारीला लागले आहेत. जिल्हा संपर्कप्रमुख संजय सावंत यांच्या नेतृत्वात जिल्ह्याचा हा दौरा यशस्वी करण्यात येणार आहे.

"आदित्य ठाकरे यांच्या दौऱ्याचे संपूर्ण नियोजन करण्यात आले आहे. त्यांच्या जिल्ह्यातील चारही सभा मोठ्या उपस्थितीत पार पडतील." - विष्णू भंगाळे, जिल्हा प्रमुख, शिवसेना, जळगाव