पारोळा-अमळनेर बसवर दगडफेक

पारोळा : चार दिवसांपूर्वी सुरू झालेल्या पारोळा-अमळनेर बसवर बुधवारी (ता. ८) दुपारी सव्वाबाराच्या सुमारास दोन अज्ञात व्यक्तींनी दगडफेक करून बसचे नुकसान केले. यात चालक किरकोळ जखमी झाला आहे.

याबाबत चालक शांताराम नथ्थू मोरे यांनी दिलेल्या फिर्यादीत म्हटले आहे, की अमळनेर आगारातून निघालेली बस (एमएच ४०, एन ९०८२) सकाळी साडेअकराला पारोळा येथे आली.

परत अमळनेरकडे जात असताना भोकरबारीपुढे दुपारी सव्वबाराच्या सुमारास तोंडाला रूमाल बांधलेल्या अज्ञात दोन व्यक्तींनी दुचाकीने बसचा पाठलाग करत समोरून बसवर चालकाच्या दिशेने दगडफेक करीत बसची काच फोडून पळ काढला. या वेळी चालक रवी पाटील यांना किरकोळ दुखापत झाली. अचानक झालेल्या हल्ल्यामुळे प्रवासी घाबरले होते. घटनास्थळी पोलिस निरीक्षक संतोष भंडारे व त्यांच्या पथकाने भेट दिली व पंचनामा करून अज्ञात दोन जणांविरुद्ध सरकारी वाहनांची तोडफोड केल्याप्रकरणी गुन्हा दाखल केला.