#TuesdayMotivation : शेतीपासून दूर नको गं बाई!
मंचर - चार बुकं शिकलेले शेती म्हटलं की नाकं मुरडतात, मुली तर शेतीपासून चार हात दूरच असतात. पण, रयत शिक्षण संस्थेच्या येथील अण्णासाहेब आवटे महाविद्यालयातील १२ विद्यार्थिनींनी ‘कमवा व शिका’ योजनेंतर्गत शेतीस प्राधान्य देत ४५ गुंठ्यांतून सात टन बटाट्याचं उत्पादन घेतलं आहे. लागवडीपासून काढणीपर्यंतची सर्व कामं मुलींनीच केली आहेत.
मंचर (ता. आंबेगाव) येथील आवटे महाविद्यालयाच्या मालकीची एकूण १०५ एकर जमीन असून, तीन पाण्याचे तलाव व फळबाग आहे. प्राचार्य डॉ. एन. एस. गायकवाड, अधीक्षक प्रभाकर पारधी यांनी पुढाकार घेत डोंगर उतार व माळरानाच्या सहा एकर जमिनीची ट्रॅक्‍टरच्या साह्याने मशागत केली. ‘कमवा व शिका’ योजनेतील मनीषा लोहकरे, जयश्री मेमाणे, रूपाली आढळ, जिजा मेठल, स्नेहल आढारी, आरती आढारी, सोनाली भोकटे, सुनीता इष्टे, मनीषा पढर, सुषमा पेकारी, लीला आढारी, अश्विनी तळपे या विद्यार्थिनींनी बटाटा व कांदा लागवडीचा प्रस्ताव दिला. त्यास डॉ. गायकवाड यांनी मान्यता दिली.
सुरुवातीला ट्रॅक्‍टरच्या साह्याने जमिनीची नांगरट केली. सरी पद्धतीने नऊ क्विंटल बटाटा वाणाची ४५ गुंठ्यांत लागवड केली. लागवड, खुरपणी, खत टाकणे ही सर्व कामे मुलींनीच केली. बटाट्याची नुकतीच काढणी करण्यात आली असून, सात टन उत्पादन झाले आहे. एक बटाटा पाऊण ते अर्धा किलो वजनाचा भरत आहे. या बटाट्यास ११ रुपये किलो याप्रमाणे बाजारभाव मिळाला आहे.
बटाटा उत्पादनासाठी ५७ हजार रुपये खर्च आला असून, खर्च वजा जाता १९ हजार ७०० रुपये निव्वळ नफा मिळाला आहे. विद्यार्थिनींना उच्च शिक्षणासाठी यामुळे आर्थिक पाठबळ मिळाले आहे. विद्यार्थिनींना शिक्षकेतर कर्मचाऱ्यांची मदत मिळाली.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.