कामगारांना लुटणार्‍यांविरूद्ध आवाज उठवणार 

सावंतवाडी - असंघटित कामगार हे गरीब आणि कष्टकरी आहेत. त्यांना लुबाडण्याचा जो प्रकार चालू आहे त्याविरोधात भारतीय जनता पार्टी गप्प बसणार नसून आमदार नितेश राणे यांच्या माध्यमातून विधान परिषदेत हा प्रश्‍न मांडण्यात येईल. असंघटित कामगारांकडून तिकीट देताना दोनशे रुपये घेतले जात आहेत. अशा एजंट आणि त्यात सामील असलेल्या अधिकार्‍यांविरोधात भारतीय जनता पार्टी आवाज उठविणार, असा इशारा आज येथे पत्रकार परिषदेत भाजप पदाधिकारी महेश सारंग यांनी दिला. 

हे पण वाचा - इंदोरीकर महाराजांचे शिवाजी विद्यापीठातील किर्तन झाले रद्द.... 

ते म्हणाले, “अनेक कामगारांच्या आमच्याकडे तक्रारी आल्या असून त्यांच्याकडून कीट देण्यासाठी दोनशे रुपये आकारण्यात येत आहेत. अशाप्रकारे एजंट व अधिकार्‍यांकडून मोठ्या प्रमाणात भ्रष्टाचार होत आहे. हा भ्रष्टाचार बाहेर काढण्यासाठी भाजप रस्त्यावर उतरणार आहे. अशा गोष्टींकडे अधिकारी दुर्लक्ष कसे काय करतात. मोफत कीट वितरण करणे आवश्यक असतानाही 200 रुपये घेऊन गरिबांना व कामगारांना लुटायचे काम होत आहे. यामध्ये मोठे रॅकेट असण्याची शक्यता आहे. असंघटित कामगारांकडून पैसे घेऊन करोडो रुपये गोळा करण्यात येत आहेत. याबाबत विधानसभेत प्रश्‍न उपस्थित करण्यात येणार आहे. आमदार राणे यांच्या माध्यमातून असंघटित कामगारांच्या प्रश्‍नाला आम्ही न्याय देणार आहोत. या जिल्ह्याचे खासदार विनायक राऊत आणि सावंतवाडी विधानसभा मतदारसंघाचे आमदार दीपक केसरकर यांना असंघटित कामगारांच्या समस्येची जाण असूनही ते गप्पच आहेत; मात्र भाजप गप्प बसणार नाही. भ्रष्टाचारामध्ये जे एजंट सामील आहेत त्या सर्वांवर कारवाई करण्यासाठी भाग पाडू.

हे पण वाचा - तिला दहावित आणायचा होता पहिला नंबर...पण शिक्षकानेच देले विष अन्... 

याबाबत आपण तक्रारही देणार आहोत. जिल्हा पोलिस अधीक्षक दीक्षितकुमार गेडाम यांची भेट घेऊन त्यांच्यासमोर हा प्रश्‍न मांडणार आहोत.”