Malvan Accident : कळपातील माकडाने रिक्षात उडी मारल्याने चालक जागीच ठार; डोक्याला गंभीर दुखापत अन्..

मालवण : मालवणहून खैदाच्या दिशेने जाणाऱ्या रिक्षात (Rickshaw) माकडाने (Monkey) उडी घेतल्याने चालकाचे नियंत्रण सुटून रिक्षा रस्त्याकडेला उलटली. या अपघातात रिक्षाचालक जागीच ठार झाला. जयराम ऊर्फ बाबजी दिगंबर मसूरकर (वय ५५, रा. खैदा कोळंब) असे त्यांचे नाव आहे.

ही काल सकाळी साडेअकराच्या सुमारास घडली. याबाबत प्रत्यक्षदर्शी गौरव कांबळी (रा. खैदा) यांनी पोलिसांना वर्दी दिली. पोलिसांनी दिलेली माहिती अशी, सकाळी साडेअकराच्या सुमारास मसूरकर रिक्षा (एमएच ०७ एएच १८६०) घेऊन मालवणहून आडारी मार्गे खैदाच्या दिशेने जात होते. चढावाच्या रस्त्यावर मसूरकर यांची रिक्षा पोहोचली. यावेळी बाजूच्या झाडीतून आलेल्या माकडांच्या कळपातील एकाने मसूरकर यांच्या रिक्षामध्ये उडी घेतली.

यामुळे मसूरकर यांचे नियंत्रण सुटून रिक्षा उलटली. डोक्याला गंभीर दुखापत झाल्याने मसूरकर जागीच ठार झाले. यावेळी तेथून दुचाकीने जाणाऱ्या कांबळी यांनी रिक्षाकडे धाव घेतली. त्यांनी मसूरकर यांचे मेहुणे उमेश मांजरेकर यांना अपघाताची माहिती दिली. यानंतर बाबा मांजरेकर यांच्या रुग्णवाहिकेतून मसूरकर यांना येथील ग्रामीण रुग्णालयात आणण्यात आले.

मात्र, डॉक्टरांनी त्यांना मृत घोषित केले. पोलिस उपनिरीक्षक शिवराज झांजुर्णे, हवालदार हेमंत पेडणेकर यांनी घटनास्थळाचा पंचनामा केला. घटना समजताच येथील रिक्षा चालकांनी ग्रामीण रुग्णालयात गर्दी केली. मसूरकर यांच्या मागे पत्नी, मुलगा, दोन मुली, जावई, नातवंडे असा परिवार आहे.