Angelo Mathews : लेट लतीफ अँजेलो मॅथ्यूजनं इतिहास रचला; क्रिकेट इतिहासात टाईम आऊट होणारा ठरला पहिला फलंदाज

Angelo Mathews Time Out : श्रीलंका आणि बांगलादेश यांच्यातील सामन्यात मोठा राडा झाला. श्रीलंकेचा अनुभवी फलंदाज अँजेलो मॅथ्यूजला टाईम आऊट करण्यात आले. मॅथ्यूज हा आंतरराष्ट्रीय क्रिकेटमध्ये टाईम आऊट होणारा पहिलाच फलंदाज ठरला. तो समरविक्रमा बाद झाल्यानंतर निर्धारित वेळेत पुढच्या चेंडूचा सामना केला नाही.

नियमानुसार, मॅथ्यूजला दोन मिनिटांत क्रीजवर पोहोचायचे होते आणि तीन मिनिटांत चेंडू खेळायचा होता. हेलमेट घेण्याच्या नादात तो 3 मिनिटात चेंडू खेळू शकला नाही. त्यामुळे मॅथ्यूजला टाईमआऊट बाद करण्यात आले. बांगलादेश संघाने अपील मागे घेतले असते तर मॅथ्यूजला खेळण्याची संधी मिळू शकली असती, पण शकिब अल हसनने तसे केले नाही.

शाकिब सामन्याचे 25 वे षटक टाकत होता. त्याने दुसऱ्याच चेंडूवर समरविक्रमाला बाद केलं होत. यानंतर श्रीलंकेचा अनुभवी खेळाडू अँजेलो मॅथ्यूज क्रीजवर येत होता. मात्र त्याला क्रीजवर येण्यात थोडा उशीर झाला. त्यात त्याच्या हेलमेटची स्ट्रीप तुटली होती. त्यामुळे तो हेलमेट बदलण्यासाठी थांबला होता. तो क्रीजवर पोहचला नाही.

त्याने बदली खेळाडूकडे दुसरे हेलमेट मागवले होते. तो अजूनही क्रीजवर पोहचला नव्हता त्यामुळे शाकिब अल हसनने टाईम आऊटची अपील केली. या परिस्थितीत पंचांची देखील पंचाईत झाली. कारण त्यांना नियम पाळणं बंधनकारक आहे. त्यामुळे त्यांनी अँजेलो मॅथ्यूजला बाद ठरवलं.

मॅथ्यूज सारख्या 225 वनडे आणि शंभराच्या वर कसोटी सामने खेळणाऱ्या खेळाडूच्या नावावर कारकिर्दीच्या या टप्प्यावर टाईम आऊट होणारा आंतरराष्ट्रीय क्रिकेटमधील पहिला खेळाडू ठरण्याचा अप्रिय इतिहास जमा झाला.

दरम्यान, मॅथ्यूजने शाकिबला अपील मागे घेण्याची विनंती देखील केली होती. मात्र शाकिबने नियमावर बोट ठेवत अपील मागं घेण्यास नकार दिला. मात्र शाकिबच्या या निर्णयावर मॅथ्यूज नाराज झाला होता. त्याने मैदानाबाहेर येत आगपाखड केली.

(Sports Latest News)