Arshdeep Singh IND vs PAK : करारा जवाब! देशद्रोही म्हणणाऱ्यांना अर्शदीप सिंगने दिले चोख प्रत्युत्तर

Arshdeep Singh India Vs Pakistan T20 World Cup 2022 : टी 20 वर्ल्डकप 2022 मधील भारत आणि पाकिस्तान यांच्यातील सामन्यात भारताने नाणेफेक जिंकून प्रथम गोलंदाजी करण्याचा निर्णय घेतला. रोहित शर्माचा हा निर्णय अर्शदीप सिंग आणि भुवनेश्वर कुमारने सार्थ ठरवला. अर्शदीप सिंगने तर पाकिस्तानला सुरूवातीलाच मोठे दोन धक्के दिले. जवळपास एका महिन्यापूर्वीच आशिया कपमध्ये पाकिस्तानविरूद्धच्या सामन्या सोपा झेल सोडल्यानंतर काही नतद्रष्टांच्या नजरेत तो देशद्रोही ठरला होता. मात्र मेलबर्नमध्ये त्याने पाकिस्तानचा कर्णधार बाबर आझम आणि मोहम्मद रिझवानची शिकार करत या नतद्रष्टाणा चोख प्रत्युत्तर दिले.

भारताने नाणेफेक जिंकून MCG च्या ग्रीन टॉपवर गोलंदाजी करण्याचा निर्णय घेतला. हा निर्णय सार्थ ठरवत भुवनेश्वर कुमारने पहिल्या षटकात फक्त 1 धाव दिली. त्यानंतर दुसऱ्या षटकात डावखुरा वेगवान गोलंदाज अर्शदीप सिंगने पहिल्याच चेंडूवर पाकिस्तानचा स्टार फलंदाज आणि कर्णधार बाबर आझमला शुन्यावर बाद करत पाकिस्तानची अवस्था 1 बाद 1 धाव अशी केली.

पाकिस्तानचा कर्णधार भोपळाही न फोडता माघारी गेल्यानंतर आता मदार मोहम्मद रिझवानवर होती. मात्र अर्शदीप सिंगने चौथ्या षटकात मोहम्मद रिझवानला देखली 4 धावांवर बाद करत दुसरा मोठा धक्का दिला. त्यामुळे पाकिस्तानची अवस्था 4 षटकात 2 बाद 15 धावा अशी बिकट झाली.