Video | Asia Cup 2022 : किंग कोहलीने केली दुखापतग्रस्त शाहीनची विचारपूस

Asia Cup India Vs Pakistan Virat Kohli Shaheen Afridi : आशिया कप 2022 ची सुरूवात 27 ऑगस्टपासून होत आहे. मात्र सर्वांचे लक्ष 28 ऑगस्टला होणाऱ्या भारत पाकिस्तान सामन्यावर असणार आहे. दरम्यान, या हाय व्होल्टेज सामन्यासाठी दोन्ही देशांचे खेळाडू दुबईत दाखल झाले आहे. गेल्या वर्षी टी 20 वर्ल्डकपनंतर भारत पाकिस्तान पहिल्यांदाच आमने सामने येत आहेत. दरम्यान, सरावासाठी जात असताना भारतीय संघ आणि पाकिस्तानी संघातील खेळाडू एकमेकांसमोर आले. पाकिस्तानचा स्टार वेगवान गोलंदाज शाहीशाह आफ्रिदी आणि विराट कोहली यांची देखील भेट झाली. यावेळी विराट कोहलीने दुखापतग्रस्त शाहीन आफ्रिदीची चौकशी केली.

पाकिस्तान क्रिकेट टीमने आपल्या अधिकृत यूट्यूब चॅनलवर एक व्हिडिओ पोस्ट केला आहे. सरावादरम्यान, भारत आणि पाकिस्तानचे खेळाडू एकमेकांच्या समोर आले. त्यावेळी भारतीय संघातील खेळाडूंनी पाकिस्तानचा वेगवान गोलंदाज शाहीन आफ्रिदीची आपुलकीने विचापूस केली. यात युझवेंद्र चहल (Yuzvendra Chahal) आणि विराट कोहलीचा समावेश होता. शाहीन आफ्रिदीने देखील या दोघांशी हस्तांदोलन करत आपल्या दुखापतीबद्दल माहिती दिली.

पाकिस्तानने गेल्या टी 20 वर्ल्डकपमध्ये भारताचा 10 विकेट्स राखून पराभव केला होता. वर्ल्डकप इतिहासातील भारताचा हा पाकिस्तानकडून झालेला पहिला पराभव होता. मात्र या सामन्यात अजून एक विशेष गोष्ट घडली होती. भारताने जरी सामना गमावला असला तरी खिलाडूवृत्तीचे उत्तम उदाहरण समोर ठेवले होते. तत्कालीन संघाचा कर्णधार विराट कोहलीने बाबर आझम आणि मोहम्मद रिझवानला मिठी मारली होती. भारत पाकिस्तान सामन्यातील हे एक वेगळे आणि खास चित्र होते. त्याचाच पुढचा अंक विराट आणि शाहीन आफ्रिदीच्या रूपात आशिया कपच्या सरावावेळी दिसला.