T20 World Cup : षटकार देण्याची आणि विकेट घेण्याची रबाडाची हॅट््ट्रिक

शारजा : इंग्लंडविरुद्धच्या सामन्यात विजय मिळवला असला तरी अंतिम सरासरीत मागे पडल्यामुळे दक्षिण आफ्रिकेचे ट्वेन्टी-२० विश्वकरंडक क्रिकेट स्पर्धेतील आव्हान संपुष्टात आले, पण या सामन्यात वेगवान गोलंदाज कागिसो रबाडा आकर्षणाचा केंद्रबिंदू ठरला. या सामन्यात अंतिम षटकात गोलंदाजी करत असताना रबाडाने पहिल्या तीन चेंडूंवर हॅट््ट्रिक केली. हॅट््ट्रिक करणारा तो दक्षिण आफ्रिकेचा पहिला आणि ट्वेन्टी-२० विश्वकरंडक स्पर्धेतील चौथा गोलंदाज ठरला.

दक्षिण आफ्रिकेच्या १९० धावांच्या आव्हानासमोर इंग्लंडचा विजयासाठी अखेरच्या षटकांत १४ धावांची गरज होती, रबाडाने पहिल्या तीन चेंडूत ख्रिस वोक्स इंग्लंड कर्णधार ऑईन मॉर्गन आणि ख्रिस जॉर्डन यांना बाद करून हॅट््ट्रिक केली. ब्रेट ली (वि. बांगलादेश), कर्टिस कॅफर (वि. नेदलँडस) आणि वानिंदू हासरंगा (वि. दक्षिण आफ्रिका) यांनी ट्वेन्टी-२० विश्वकरंडरक स्पर्धेत हॅट्ट्रिक केलेली आहे.२००७ मध्ये झालेल्या पहिल्यावहिल्या ट्वेन्टी-२० विश्वकरंडक स्पर्धेत ब्रेट लीगने पहिली हॅट््ट्रिक केली होती. त्यानंतरच्या तिन्ही हॅट््ट्रिक यंदाच्या स्पर्धेत झाल्या आहेत.

ट्वेन्टी-२० प्रकारात हॅट्ट्रिक करणारा रबाडा एकूण २५ वा गोलंदाज आहे, तर दक्षिण आफ्रिकेकडून पहिला. एकदिवसीय किंवा ट्वेन्टी-२० प्रकारात दक्षिण आफ्रिकेच्या इतर कोणत्याही गोलंदाजाला अशी कामगिरी करता आलेली नाही.इंग्लंडला अखेरच्या षटकात १४ धावांची गरज असताना हॅट््ट्रिक करणाऱ्या रबाडाने या षटकांत तीनच धावा दिल्या, परंतु सामन्यातील त्याची एकूण कामगिरी ४८ धावांत ३ बळी अशी झाली. रबाडाने हे यश मिळवण्याच्या अगोदर त्याच्या एका षटकांत लिव्हिंगस्टोनने सलग तीन षटकार मारून षटकारांची हॅट््ट्रिक केली होती.

दृष्टिक्षेपात...

• एकदिवसीय आणि ट्वेन्टी-२० प्रकारात हॅट््ट्रिक करणारा रबाडा पहिला गोलंदाज

• अखेरच्या षटकात ख्रिस वोक्स, ऑईन मॉर्गन आणि ख्रिस जॉर्डन यांना केले बाद

• ट्वेन्टी-२० प्रकारात एकूण २५ वी हॅट््ट्रिक