Gautam Gambhir : बीसीसीआयने साधला संपर्क; गौतम गंभीर होणार द्रविडचा उत्तराधिकारी?

Gautam Gambhir BCCI Head Coach : भारताचा माजी सलामीवीर गौतम गंभीर हा भारतीय संघाचा नवा प्रशिक्षक होण्याची शक्यता आहे. बीसीसीआयने राहुल द्रविडची मुख्य प्रशिक्षकाची जागा गंभीरने घ्यावी यासाठी बीसीसीआयने गौतम गंभीरशी संपर्क साधला आहे. या बाबातची माहिती इएसपीएन क्रिकइन्फोने दिली आहे. राहुल द्रविडचा प्रशिक्षक पदाचा कार्यकाळ हा जूनमधील टी 20 वर्ल्डकपनंतर संपणार आहे.

राहुल द्रविडने बीसीसीआयला तो भारतीय संघाच्या प्रशिक्षकपदाची दुसरी टर्म घेण्यास उत्सुक नसल्याचे सांगितले. दरम्यान, गौतम गंभीरला आंतरराष्ट्रीय संघाचे प्रशिक्षक म्हणून कोणताही अनुभव नाही. मात्र त्यानं दोन आयपीएल फ्रेंचायजींचे प्रशिक्षकपद भुषवलं आहे.

गंभीर हा लखनौ सुपर जायंट्सचा 2022 आणि 2023 च्या हंगामात मेंटॉर होता. दोन्ही हंगामात लखनौने प्ले ऑफ गाठली होती. त्यानंतर गंभीरनं केकेआरकडे वळला. तो या हंगामात केकेआरचा मेंटॉर म्हणून काम करतोय. केकेआरने यंदाच्या हंगामात अव्वल स्थान मिळवत प्ले ऑफमध्ये दिमाखात प्रवेश केला आहे.

गंभीर हा भारताच्या 2007 च्या टी 20 वर्ल्डकप विजेत्या संघातील खेळाडू आहे. त्याचबरोबर त्यानं 2011 च्या वनडे वर्ल्डकपमध्ये भारताच्या विजयात मोलाचा वाटा उचलला होता. त्याने केकेआरचे नेतृत्व करताना दोनवेळा आयपीएल टायटल जिंकून दिले.

केकेआरने 2012 आणि 2014 च्या हंगामात विजय मिळवला होता. त्यानंतर 2014 च्या चॅम्पियन्स लीग टी20 स्पर्धेत देखील अंतिम फेरीत धडक मारली होती.

(Cricket Marathi News)