Rohmalia News : 3.2 ओव्हर, 0 धावा, 7 विकेट्स… 17 वर्षीय क्रिकेटपटूने पदार्पण सामन्यात केला कहर

इंडोनेशियाची ऑफ-स्पिनर रोहमालियाने बुधवारी महिला टी-20 आंतरराष्ट्रीय क्रिकेटमध्ये सर्वोत्तम गोलंदाजीचा नवा विश्वविक्रम नोंदवला. बाली येथे झालेल्या पाचव्या टी-20 सामन्यात तिने मंगोलियाविरुद्ध 3.2 षटकात 0 धावा देऊन 7 विकेट घेतले. आंतरराष्ट्रीय क्रिकेटमधील पदार्पणाच्या सामन्यातच तिने ही कामगिरी केली.

रोहमालियाच्या आधी नेदरलँड्सची वेगवान गोलंदाज फ्रेडरिक ओव्हरडाइकने 2021 टी-20 वर्ल्ड कप युरोप क्षेत्र पात्रता फेरीत फ्रान्सविरुद्ध 3 धावांत 7 विकेट घेतल्या होत्या. ओव्हरडाइकनंतर महिला टी-20 मध्ये एका सामन्यात सात विकेट घेणारी रोहमालिया तिसरी गोलंदाज आहे. या दोघींशिवाय अर्जेंटिनाच्या ॲलिसन स्टॉक्सने पेरूविरुद्ध 3 धावांत सात बळी घेतले आहेत.

त्या सामन्याबद्दल बोलायचे झाले तर, सलामीवीर नी पुटू आयु नंदा साक्रीनीच्या 61 धावांच्या जोरावर इंडोनेशियाने 5 गड्यांच्या मोबदल्यात 151 धावा केल्या. प्रत्युत्तरात मंगोलियाचा संघ 24 धावांवर ऑलआऊट झाला. इंडोनेशियाने हा सामना 127 धावांनी जिंकला. रोहमालियाने पहिल्याच चेंडूवर विकेट घेतली आणि एकूण फक्त 20 चेंडू टाकले.